Республика көлемінде жүргізіліп жатқан "Қару" операциясы барысында Атырау облысының тұрғындары полиция органдарына қырыққа жуық атыс қаруы мен үш жарым мыңнан астам оқ-дәрі тапсырды. Олардың бесеуі - иір ойықты, қалғандары тегіс ұңғылы қарулар. Ерікті түрде заңсыз сақтаудағы атыс қарулары мен оқ-дәрілерді тапсыратын азаматтарға сыйақы ретінде республикалық қазынадан 3 миллион теңгеге жуық қаражат бөлініп отыр.
"Азаматтарға сыйақы ҚР Ішкі істер министрінің "Заңсыз сақталған атыс қаруын, оқ-дәріні және жарылғыш заттарды азаматтардың ерікті түрде өтемді тапсыру қағидаларына бекіту туралы" бұйрығының талаптарына сәйкес төленетін болады", - деп хабарлады облыстық полиция департаментінің баспасөз хатшысы Гүлнәзира Мұхтарова.
Айта кету қажет, ерікті түрде заңсыз сақталған қару-жарақ пен оқ-дәрілерді тапсырғандар қылмыстық және әкімшілік жауапкершіліктен босатылады. Акция мақсаты - халықтан заңсыз сақталудағы атыс қарулары,оқ дәрілер мен жарылғыш заттарды сатып алу, сондай-ақ, қоғамдық қауіпсіздікті қамтамасыз ету, заңсыз айналымдағы атыс қаруларын қолдана отырып жасалатын қылмыстардың алдын алу.
Құралай Қуатова
