Атырауда маммология орталығы ашылды, деп хабарлайды inbusiness.kz порталы облыстық денсаулық сақтау басқармасының баспасөз қызметіне сілтеме жасап.
Облыс орталығында алғашқы маммология орталығы ашылды. Іс-шараға Атырау облысының әкімі Махамбет Досмұхамбетов пен Қазақстанның бас онкологы Диляра Қайдарова қатысты.
Медициналық мекеме қала тұрғындарына тегін қызмет көрсетеді.
"Жаңа орталық жылына 8 мыңға дейін зерттеу жүргізеді. Мұнда заманауи жабдықтар бар. Бұл онкология ауруларын дер кезінде анықтап, шұғыл емдеуге мүмкіндік береді", – деді облыс әкімі.
Еліміздің бас онкологының айтуынша, маммология орталығы әйелдер арасында скрининг жүргізу сапасын арттырады.
Бұл қызмет өңірде мемлекеттік-жекеменшік әріптестік аясында көрсетіледі.
"Елімізде 23 маммология орталығы бар. Атырауда ашылған орталықта гормондық және молекулярлық-генетикалық зерттеу жүргізетін клиникалық-диагностикалық зертхана бар. Ол өлшемі 1 мм дейінгі қатерлі ісікті анықтауға мүмкіндік береді", – деді Диляра Қайдарова.
Облыстық денсаулық сақтау басқармасының басшысы Асхан Байдувалиевтің айтуынша, бүгінде Атырау өңірі онкологиямен ауру көрсеткіші бойынша 13-орында тұр.
"Жыл сайын өңірде 700-ден аса ауру дерегі анықталады. Қазір 4 мыңға жуық науқас облыстық онкологиялық диспансерде есепте тұр. Сондай-ақ сүт безі қатерлі ісігі көрсеткіші бойынша облыс 2-орында. Бірінші стадиядағы сүт безі қатерлі ісігі бар науқастарды анықтау өте төмен деңгейде. Жаңа орталық бұл ауруды ерте анықтауға мүмкіндік береді",– деді Асхан Байдувалиев.
