Атырау қаласында бес қабатты тұрғын үйден өрт шығып, 6 адам құтқарылды, деп жазады inbusiness.kz ТЖМ баспасөз қызметіне сілтеме жасап.
Ақпаратқа сәйкес, 24 қаңтар күні сағат 17:24-те қаладағы бес қабатты тұрғын үйден өрт шыққаны туралы хабар келіп түскен.
"Өрт сөндіру бөлімшелері оқиға орнына келгеннен кейін екінші қабаттағы пәтердің жанып жатқаны анықталды. 30 шаршы метрді алатын аумақта жатын және ас үй бөлмелері, жиһаз бен тұрмыстық техника өртенген. Облыстық ТЖД өрт сөндірушілері автосатының көмегімен және баспалдақ маршымен бесінші қабаттан 6 адамды, оның ішінде 4 баланы құтқарды", - делінген ведомство таратқан ақпаратта.
Өрт сағат 17:44-те жойылды. Оқыс оқиға салдарынан 1969 жылы туған пәтер иесі мен 1964 жылы туған азаматшаны күйік шалып, облыстық ауруханаға жатқызылды.
Бүгінгі таңда өрттің шығу себептері анықталып жатыр.
"Өртті сөндіруге Атырау облысы ТЖД 8 қызметкері мен 3 бірлік техникасы жұмылдырылды", - деп атап өтті ТЖМ.
