/img/tv1.svg
RU KZ
Атырауда жоғалып кеткен малшы табылды (Видео)

Атырауда жоғалып кеткен малшы табылды (Видео)

Оны екі күннен кейін, БҚО-ға қарасты аймақтан тапты. 

24 Қыркүйек 2020 11:09 219

Атырауда жоғалып кеткен малшы табылды  (Видео)

Атырауда 20 қыркүйек күні  мал іздеп шығып кеткеннен оралмаған азамат аман-есен табылды. Іздеушілер оны Батыс Қазақстан облысы Жаңақала ауданы Мәштісай ауылының тұсындағы Сабила құдық учаскесінің шабындық жерінен тапқан.

Индер аудандық полиция бөліміне 20 қыркүйек күні сағат 22:00 шамасында Өрлік ауылының тұрғынынан осы ауылға қарасты «Көкат» шаруа қожалығының жұмысшысы 51 жастағы Аманкелді Есовтың белгісіз бағытқа мал айдап кеткеннен қайта оралмағаны туралы хабарлама келіп түседі. Аудан полицейлері жедел іздестіру жұмыстарын хабарлама түскен сәттен бастаса да, ешқандай нәтиже болмай келген-ді. Ақыры, арада екі күн өткеннен кейін таңғы сағат 03:30 шамасында Аманкелді Есов табылады.

Жолдан адасып, екі күн бойы нәр сызбаған, әбден әлсіреп, оның үстіне жауын астында қалған азаматқа полицейлер дереу алғашқы көмек көрсетіп, киімдерін ауыстырып, аман-есен үйіне жеткізген. «Көкат» шаруашылығының қожайыны Индер ауданының полицейлеріне жұмысшы Аманкелді Есовты дер кезінде тауып, көмек көрсеткендері үшін бейнежазба арқылы алғысын жеткізді.

 

Құралай Қуатова

Дертпен күрескен дәрігерлердің үстемақысы төленбей қалған

Арнайы комиссия осыған қатысты құжаттарды қарауда.  

25 Қыркүйек 2020 12:15 407

Атырау облысы Индер ауданының короновирус дертімен күресіп жатқан дәрігерлеріне шілде, ішінара тамыз айларының үстемақысы төленбей қалған. Қазіргі күні олардың арыз-шағымы қаралып жатыр.

«Мен бұл қызметке 2 қыркүйек күні ғана тағайындалдым. Ал болған жағдай маған дейін орын алған. Аудандағы медициналық қызметкерлер маусым, тамыз айларына тиесілі ұстемақыларын алады да, неге екенін, шілде айына алмай қалады. Меніңше, мұның табель толтырылмай қалды, қағазы жіберілмей қалды дегендей түрлі себебі болуы мүмкін, дегенмен, бұған менің қатысым жоқ деп қарап отырмай, тиесілі мекемелерге аяқтай кіріп шықтым», - дейді Индер аудандық ауруханасының директоры Анар Доспаева.

Сонымен, Атырау облыстық денсаулық сақтау ұйымдары қызметкерлерінің үстемақысын белгілейтін арнайы комиссияға жолданған хат мазмұны мынадай: «... Индер аудандық ауруханасының 2,3 қауіп тобына жататын короновирустық инфекцияға қарсы күреске тартылған эпидемиологиялық іс-шараларға қатысқан  кейбір медицина қызметкерлерінің: 1)мамандандырылған кеңес берген консультант дәрігерлер (кеңес берген уақыты ғана қойылып отыр) шілде айына; 2)клиникалық лаборанттар КВИ науқастардан (қол әдісімен қан алған уақыты) шілде айына;3)шұғыл аурухананың қабылдау бөлімінде кезекшілікте тұрғандар, ембикелер шілде айына; 4)34 кереуеттік КВ, 10 керуеттік провизорлық аурухананың қабыладу бөлімі шілде айына; 5)Үй стационарында емдеу жүргізген, КВИ ошақтарын бақылау, қадағалау жасаған, КВИ науқастардан, контактныйлардан сүртінді алған БМСК мамандары шілде, тамыз айына ала алмаған жалақыға үстемақы алу мүмкіншілігін қарастыруды сұрайды». Бұдан әрі құжатқа осы қызметкерлердің шілде, тамыз айларына арналған табельдері қоса тіркеледі.

«Индер ауданы бойынша медициналық қызметкерлердің жазып жатқан арыз-шағымдарына байланысты өтемақы төлеу жайы бір күнде қаралып бітетін мәселе емес. Комиссия мүшелері керекті медициналық карталар, еңбекке жарамсыздық жөніндегі құжат және диагнозды басшылыққа ала отырып, заң аясында шешім қабылдайды», - деп мәлімдеді облыстық денсаулық сақтау басқармасының басшысы Нұрлыбек Қабдықапаров.

Белгілі болғандай, короновирус инфекциясынан көз жұмған және вирус  жұқтырған медициналық қызметкерлерге өтемақы төлеу бойынша құрылған арнайы комиссияның жұмысы қауырт, қаралып жатқан құжат көп. Мәселен, күні кеше оның  бесінші отырысы өтіп, онда 232 медициналық қызметкердің құжаты қаралған. Олар бойынша шешімдер кезең-кезеңімен қабылданбақ.

Облыстық денсаулық сақтау басқармасының баспасөз қызметінің хабарлауынша, пандемиямен күрес кезінде коронавирус жұқтырған атыраулық медициналық қызметкерлерінің ішінде 88 адамға әрқайсысына 2 млн.теңгеден өтемақы төленген. Бұдан бөлек, пандемия салдарынан көз жұмған үш медициналық қызметкердің отбасының әрқайсысына 10 млн.теңге өтемақы беріледі. Ал, коронавируспен күреске жұмылдырылған медициналық қызметкерлердің жалақысына үстемақы ай сайын төленіп отыр.

Қазірде Индер ауданында КВИ ахуал қалыпты, оған байланысты ашылған провизорлық стационар жабылған. Алайда, ақ халаттылар тиесілі ақысын сұрап отырған жаз айларында аталған инфекция аймақта өршіп тұрған болатын.

Құралай Қуатова

Атыраудағы «Учаске» шарасы қаңғыбас балаларды анықтауда

Жыл басынан бері кәмелетке толмағандарды бейімдеу орталығына 43 жасөспірім орналастырылған.  

16 Қыркүйек 2020 20:06 287

Шымкентте тұратын он алты жасар бала «INDRIVER» таксиімен өз бетінше Атырау қаласына келіпті. Ондағы ойы – мұнайлы астананы аралап көру екен. Алайда, «Учаске» іс-шарасы кезінде жас «саяхатшыны»  көше кезін жүрген кезінен тапқан полиция қызметкерлері оны кәмелетке толмағандарды бейімдеу орталығына орналастырған. Қазір баланың  ата-анасын немесе заңды өкілдері анықталып жатыр.

Айта кетейік, жыл басынан бері кәмелетке толмағандарды бейімдеу орталығына 43 жасөспірім орналастырылған. Олардың ішінде 24 бала әке-шешесінің қадағалауынсыз түнгі уақытта жүрген, тағы екі баланың   анасының төлқұжаты мен тұрақты мекен-жайы болмаған, алты баланың ата-анасы оның тәрбиесімен мүлдем айналыспаған, үш баланың анасы ащы суға бейім, бір баланың анасы нашақорлықтан емделуде, төрт балақанды үйде ұрып-соғатын болған. Бұл айтылғандардан бөлек, бір баладан  қорғаншысы, тағы бір баладан тәрбиелей алмайтынын айтып ата-анасы жазбаша бас тартыпты.  

Сондай-ақ, Индер ауданынан 49 және 42 жастағы ерлі-зайыптыларды ата-аналық құқығынан шектеу туралы ювеналды полиция ұсынысы қанағаттандырылып, комиссия мүшелері бірауыздан қол қойған құжат сотқа жолданған. Индер аудандық кәмелетке толмағандардың құқығын қорғау жөніндегі комиссиясы баяндағандай, бұл кісілерге осымен төрт рет ескерту жасалған. Соңғы рет олар 2008 жылы туған балаларын бір аптаға таныстарының үйіне қалдырып, өздері басқа жаққа қыдырып кеткен. Сот шешімі шыққан жағдайда, олардың балаға қатысты құқықтары алты айға дейін шектеледі.

Құралай Қуатова,

Атырау облысы