/img/tv1.svg
RU KZ
Атыраудағы «Учаске» шарасы қаңғыбас балаларды анықтауда

Атыраудағы «Учаске» шарасы қаңғыбас балаларды анықтауда

Жыл басынан бері кәмелетке толмағандарды бейімдеу орталығына 43 жасөспірім орналастырылған.  

16 Қыркүйек 2020 19:56 197

Атыраудағы «Учаске» шарасы қаңғыбас балаларды анықтауда

Шымкентте тұратын он алты жасар бала «INDRIVER» таксиімен өз бетінше Атырау қаласына келіпті. Ондағы ойы – мұнайлы астананы аралап көру екен. Алайда, «Учаске» іс-шарасы кезінде жас «саяхатшыны»  көше кезін жүрген кезінен тапқан полиция қызметкерлері оны кәмелетке толмағандарды бейімдеу орталығына орналастырған. Қазір баланың  ата-анасын немесе заңды өкілдері анықталып жатыр.

Айта кетейік, жыл басынан бері кәмелетке толмағандарды бейімдеу орталығына 43 жасөспірім орналастырылған. Олардың ішінде 24 бала әке-шешесінің қадағалауынсыз түнгі уақытта жүрген, тағы екі баланың   анасының төлқұжаты мен тұрақты мекен-жайы болмаған, алты баланың ата-анасы оның тәрбиесімен мүлдем айналыспаған, үш баланың анасы ащы суға бейім, бір баланың анасы нашақорлықтан емделуде, төрт балақанды үйде ұрып-соғатын болған. Бұл айтылғандардан бөлек, бір баладан  қорғаншысы, тағы бір баладан тәрбиелей алмайтынын айтып ата-анасы жазбаша бас тартыпты.  

Сондай-ақ, Индер ауданынан 49 және 42 жастағы ерлі-зайыптыларды ата-аналық құқығынан шектеу туралы ювеналды полиция ұсынысы қанағаттандырылып, комиссия мүшелері бірауыздан қол қойған құжат сотқа жолданған. Индер аудандық кәмелетке толмағандардың құқығын қорғау жөніндегі комиссиясы баяндағандай, бұл кісілерге осымен төрт рет ескерту жасалған. Соңғы рет олар 2008 жылы туған балаларын бір аптаға таныстарының үйіне қалдырып, өздері басқа жаққа қыдырып кеткен. Сот шешімі шыққан жағдайда, олардың балаға қатысты құқықтары алты айға дейін шектеледі.

Құралай Қуатова,

Атырау облысы

Атырауда жоғалып кеткен малшы табылды (Видео)

Оны екі күннен кейін, БҚО-ға қарасты аймақтан тапты. 

24 Қыркүйек 2020 11:09 107

Атырауда 20 қыркүйек күні  мал іздеп шығып кеткеннен оралмаған азамат аман-есен табылды. Іздеушілер оны Батыс Қазақстан облысы Жаңақала ауданы Мәштісай ауылының тұсындағы Сабила құдық учаскесінің шабындық жерінен тапқан.

Индер аудандық полиция бөліміне 20 қыркүйек күні сағат 22:00 шамасында Өрлік ауылының тұрғынынан осы ауылға қарасты «Көкат» шаруа қожалығының жұмысшысы 51 жастағы Аманкелді Есовтың белгісіз бағытқа мал айдап кеткеннен қайта оралмағаны туралы хабарлама келіп түседі. Аудан полицейлері жедел іздестіру жұмыстарын хабарлама түскен сәттен бастаса да, ешқандай нәтиже болмай келген-ді. Ақыры, арада екі күн өткеннен кейін таңғы сағат 03:30 шамасында Аманкелді Есов табылады.

Жолдан адасып, екі күн бойы нәр сызбаған, әбден әлсіреп, оның үстіне жауын астында қалған азаматқа полицейлер дереу алғашқы көмек көрсетіп, киімдерін ауыстырып, аман-есен үйіне жеткізген. «Көкат» шаруашылығының қожайыны Индер ауданының полицейлеріне жұмысшы Аманкелді Есовты дер кезінде тауып, көмек көрсеткендері үшін бейнежазба арқылы алғысын жеткізді.

 

Құралай Қуатова

Атырауда айыппұл көбейді

Полиция бірнеше рейд жүргізіп жатыр. 

14 Қыркүйек 2020 12:27 106

Атырауда бірнеше құқықтық рейд қатар жүргізіліп жатыр. Атап айтқанда, «Таза Қазақстан» акциясы аясында Жайық жағалауын тексеру кезінде ішімдік ішкен үш адам анықталып, олардың әрқайсысына бес айлық есептік көрсеткіш көлемінде айыппұл салынған. Бұдан бөлек, «Учаске» жедел профилактикалық іс-шарасы кезінде қазірге дейін қырықтан астам тұрғын үй, оннан аса азық-түлік дүкендері, көлік жуу орталықтары, басқа да бірқатар мекеме тексерілді. Осының нәтижесінде Абай көшесінде орналасқан «Аружан» азық-түлік дүкеніне дабылқаққыш пен бейнекамера орнатылмағандығы анықталып, дүкен иесіне қылмыстың алдын алу үшін бақылау құралдарын орнату керектігі түсіндірілді. Осындай көрініс жиі кездескен Дамбы округі бойынша да ауыл басшылығына ұсыныстар айтылған.

Сондай-ақ, мұнайлы астанада 10 қыркүйек күнгі сағат 15:00-де «Сергек» бейнебақылау жүйесі іске қосылған болатын. Одан кейінгі бір ғана тәулік ішінде «ақылды» жүйе үш жүзден астам жолда жүру ережесін бұзу дерегін тіркеген.

«Бұлар, негізінен, тоқтау сызығын, үздіксіз сызықтың қиылысын басу, жылдамдықты арттыру, сондай-ақ, бағдаршамның тыйым салатын белгісінен өтіп кету», – деп түсіндірді облыстық полиция департаментінің баспасөз қызметі.

Құралай Қуатова