Жамбыл облысындағы спорт мекемелеріне жүргізілген аудиторлық тексеріс бірқатар қаржылық былықтың бетін ашты, деп хабарлайды Atameken business.
"Мәселен, "Тараз" футбол клубы бақандай 610 млн теңгені негізсіз жаратқан. Кәсіпқой клуб 2020-шы жылы 5 млн теңгелік сыйақыны 39 қызметкерге заңсыз үлестіріп берген. Мұнан өзге Түркиядағы оқу-жаттығуға жұмсалған 20 млн теңгенің қаржылық құжаты жоқ. Нақтысы легионерлермен ұшып-келу және қажетті шығындарға келісім-шарт жасалмаған", - дейді тексеру комиссиясы.
Аудиторлық тексеріс клубтың 422 млн теңге көлемінде салық берешегі барын айтады. Енді тиісті тарап алдағы 1 желтоқсанға дейін 63 млн теңгені мемлекет қазынасына қайтаруға тиіс. Олай болмаған жағдайда, іс сотқа өтпек. Жалпы тексеру комиссиясы 40-қа жуық мекемеде мониторинг жүргізген. Мұнан өзге "Тараз-арена" спорт кешені де 15 млн теңгені мақсатсыз жұмсағаны анықталып отыр.
