Еліміздің Төтенше жағдайлар министрлігі Ақтау маңында болған әуе апатына қатысты соңғы ақпаратты таратты, деп жазады inbusiness.kz сайты.
ТЖМ Төтенше жағдайларды жою департаменті апат-құтқару қызметтерінің күштері мен құралдары басқармасының бастығы Қайрат Жанаспаев ұшақ бортында 67-ден де көп адам болғанын айтты.
– Алдын ала ақпарат бойынша ұшақ бортында 69 адам болған, оның 5-еуі – экипаж мүшесі. Оның ішінде 42 Әзірбайжан азаматы, 6 Қазақстан азаматы, 3 Қырғызстан азаматы және 16 РФ азаматы болған, – деді ол.
Қайрат Жанаспаевтың сөзінше, қазір оқиға орнында құтқару жұмыстары жалғасуда. Құтқару жұмыстарына 701 жеке құрам және 82 бірлік техника жұмылдырылған.
– 28 адам ауруханаға жеткізілді, оның 2-еуі – бала, – деп сөзін толықтырды министрлік өкілі.
Осыған дейін ұшақ апатынан зардап шеккендерге қатысты соңғы мәліметті жариялаған едік.
