Халықаралық Қызыл Крест және Қызыл Жарты Ай ұйымы қызметкерлеріне жасалған шабуылдан соң Ауғанстандағы қызметін тоқтатты, деп жазады Би-би-си.
Сәрсенбі күні қарулы адамдардың шабуылынан Қызыл Жарты Айдың алты қызметкері қаза болды. Тағы екі қызметкер хабар-ошарсыз.
Халықаралық ұйым өкілдері мән-жайды анықтағанша гуманитарлық миссияны уақытша тоқтата тұратындығын мәлімдеді. Сондай-ақ Ауғанстан жерінде ұйым қызметкерлерінің аяусыз өлтірілуі жиілеп кеткенін атап көрсетіп отыр.
Аса қажетті заттар тасымалдаған 3 жүргізуші және 5 қызметкерден тұратын Халықаралық Қызыл Крестің гуманитарлық көші 8 ақпанда Джаузджан аймағында ойламаған жерден шабуылға тап болған.
Полицияның айтуынша, шабуылды әлемнің көптеген елінде лаңкестік топқа жатқызылған "Ислам мемлекеті" содырлары ұйымдастырған.
