Аустралиялық "C29 Metals" компаниясы Табиғи ресурстар және қоршаған ортаны қорғау департаментінен "Ұлытау" уран жобасы бойынша бұрғылауға және барлауға 2-санаттағы ресми экологиялық рұқсат алды, деп хабарлайды inbusiness.kz сайты.
Компания сонымен қатар, "Қазатомөнеркәсіп" ұлттық уран компаниясының 100 пайыз еншілес компаниясы болып табылатын "Volkov Geology-мен" өзара түсіністік туралы меморандумға 28 қазанында қол қойған.
"Келіссөздер жалғасуда. Біз Volkov Geology - мен және тәуелсіз бұрғылау мердігерімен коммерциялық келісімнің өте дамыған сатысында екенімізге қуаныштымыз", – делінген "C29 Metals" хабарламасында.
Компания стратегиялық бұрғылаудың бастапқы бағдарламасы қысқа болатынын атап өтті.
"Біздің командаға осы маусымдағы бастапқы гауһар бұрғылау бағдарламасын бастауға ресми экологиялық рұқсат пен мүмкіндік бергеніне қуаныштымыз. Бұрғылауға рұқсаттың барлық нормативтік талаптары орындалғаны туралы ресми хабарламаны тез алдық. Бұл рұқсат Қазақстандағы қолайлы өндірістік орта мен компанияға қолдаудың барын тағы бір рет көрсетті", – деді C29 Metals басқарушы директоры Шеннон Грин.
Әзірлеушінің өндірістік базасы жақын маңдағы Ақсүйек ауылында орналасады. Компанияның айтуынша жергілікті тұрғындар да C29 Metals-қа үлкен қолдау жасап жатыр.
Қарастырылып отырған учаске Кеңес Одағы кезінде уран өндірілген ең ірі уран кен орындарының бірі "Бота Бурум" кенішінен шамамен 15 шақырым жерде орналасқан. Ауданда уранды барлау 1953 жылдан бері жүргізіліп келеді. Ал өндіру 1956 жылы басталып, 1991 жылға дейін жалғасты.
