Халық алдында есеп беру кездесуінде Ұлттық экономика министрі Руслан Дәленов "Ауыл ел – бесігі" жобасы арқылы келер жылы 98 млрд теңгеге 920 жоба жүзеге асатынын айтты.
"Елбасының бастамашылығымен ауылдағы өмір сапасын жақсартып, инфрақұрылым салу үшін 2019 жылы "Ауыл ел – бесігі" жобасы қолға алынған. Былтырғы жылдан бері 34 млрд теңгеге 520 жоба орындалды. 2020 жылға қаржыландыру үш есе ұлғайды. Жобада қамтылатын ауыл саны төрт есе артты. "Ауыл ел – бесігі" жобасы арқылы 98 млрд теңгеге 920 жоба жүзеге асып, 216 ауыл қамтылады. Жалпы, жоба аясында 2027 жылдың соңына дейін 3 561 ауылдың инфрақұрылымы жетілдіріледі", – деп айтып өтті Руслан Дәленов.
Айта кетсек, "Ауыл ел – бесігі" жобасына ауыл тұрғындары үшін маңызды мектептер, медициналық амбулаториялар, жолдар салу, көшелерге жарық тарту, спорт алаңдарын, дене шынықтыру-сауықтыру кешендерінің құрылысы және басқа да инфрақұрылымдық іс-шаралар жатады.
Нұржан Көшкін
