Үкімет басшысының дерегінше, қаңтар-қарашада экономиканың өсу қарқыны 2,7% деңгейінде болды. Биыл қаңтар-қазанда сыртқы сауда айналымы 34%-ға өсіп, $111 млрд-ты құрады. Экспорт 45%-ға, соның ішінде өңделген тауарлар экспорты 35%-ға өсті. Биыл қараша айындағы жағдай бойынша Қазақстанда инфляция көрсеткіші 19,6%-ды құрады.
Әлихан Смайловтың айтуынша, елдегі инфляцияның шарықтауына геосаяси шиеленістің күшеюі, әлемдегі бағаның рекордтық өсуі, логистиканың бұзылуы және көрші елдерде кейбір тауарлардың экспортына уақытша шектеулердің енгізілуі ықпал етіп отыр.
"Қазіргі кезде Үкімет инфляцияны бақылау және төмендету бойынша шаралар кешенін іске асыруда. Оның шеңберінде жедел және орта мерзімді іс-шаралар көзделген. Олар ішкі нарықтағы отандық тауарлардың үлесін арттыруға, тауарларды сақтау және тасымалдау тетіктерін дамытуға, бөлшек сауданы қолдауға бағытталған", — деді Әлихан Смайылов.
Үкімет басшысының дерегінше, елімізде биыл 21 млн тонна астық жиналған.
