/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 406,30 Brent 36,55
Ауылдарды тасқын су баспауы үшін өзен арнасы тазартылуда

Ауылдарды тасқын су баспауы үшін өзен арнасы тазартылуда

Су қоймаларынан көп мөлшерде су ағызылуы мүмкін. 

10 Наурыз 2020 17:19 287

Ауылдарды тасқын су баспауы үшін өзен арнасы тазартылуда

Экология, геология және табиғи ресурстар вице-министрі Сергей Громов қар еруіне байланысты өзен арналарындағы жағдай мен елдімекендерді су басу қаупі жайлы айтты.

«Апта сайынғы болжамға сәйкес, еліміздің барлық аумағында біртіндеп күн жылынады. Алайда наурыз, сәуір айларында бір тәулік ішінде айлық мөлшердегі жауын-шашын түсуі мүмкін. Еліміздің суқоймаларын бақылауда ұстау үшін кезекшілік ұйымдастырылды. Су қоймаларының сиымдылығын сақтау мақсатында кестеге сай су ағызылып отырады. Сондай-ақ қосымша көшпелі бақылау-зарттеу жұмыстары жүргізілуде. Осы жағдайға байланысты ұсыныстар әзірленіп, олардың қалай орындалып жатқаны тексерілуде», - деді Сергей Громов.

Министрлік өкілі су қоймаларынан су ағызған кезде өзеннің төменгі ағысында орналасқан ауылдарды су басу қаупі бар екенін жоққа шығармады.

«Биыл қар көп жауғаны белгілі. Егер ол жылдам ери бастаса су қоймаларынан көп мөлшерде су ағызуға тура келеді. Өзендердің төменгі жағындағы жерлерді су басуы мүмкін. Өйткені өзендердің су өткізу мүмкіндігі төмен. Олардың түбі сазданып, жағасына өсімдік өсіп кеткен. Айта кету керек, Нұр-Сұлтан қаласының әкімдігі жеті шақырым өзен арнасын тазалады. Алайда Ақмола облысында бұл жұмыс баяу жүргізілуде. Сол себепті, жергілікті атқарушы органдар елдімекендерді су баспауы үшін, өзендердің су өткізу мүмкіндігін арттыру жұмыстарын жылдам орындауы қажет. Су қоймаларының сыйымдылығын арттыру жөнінде министрлік қабылдаған шаралар өзен арналарының кеңеюімен қатар кешенді түрде жүргізіледі», - деді вице-министр.

Нұржан Көшкін

Қазақстандық балуандар бір медаль мен бір жолдама жеңіп алды

Нұр-Сұлтанда өтіп жатқан күрес түрлерінен әлем чемпионатында «классиктер» арасындағы бәсеке толығымен аяқталды. 

18 Қыркүйек 2019 08:08 1058

Қазақстандық балуандар бір медаль мен бір жолдама жеңіп алды

Фото: olympic.kz

Елорда төрінде грек-рим күресінен 60, 77 және 130 келідегі жеңімпаздар мен жүлдегер есімі анықталып, әйелдер күресінен төрт салмақ дәрежесіндегі финалистер есімі белгілі болды. қазақстандық балуандар бір медаль мен бір жолдама жеңіп алды, деп жазады Olympic.kz. 

Грек-рим күресінен Қазақстан командасы әлем чемпионатын бір күміс және екі қола медальмен аяқтады. Қорлан Жақанша (55 келі) мен Алмат Кебіспаевтың (63 келі) жеңісті жолын Мейрамбек Айнағұлов жалғастырды. 60 келіде белдескен Айнағұлов кіші финалда украиналық Ленур Темировті 10:0 есебімен жеңіп, өзінің жүлде қоржынын әлем біріншілігінің қола жүлдесімен толықтырды. Осыған дейін Мейрамбек 2017 жылғы әлем чемпионатының күміс жүлдесін иеленген болатын.  «Еліміздегі әлемдік доданы жүлдемен аяқтағаныма қуаныштымын. Қолдау көрсеткен жанкүйерлерге рахмет. Медальмен бірге, Олимпиада жолдамасына қол жеткізгеніміз де үлкен жетістік. Бұйырса, 2020 жылы өтетін Токио Олимпиадасында алтын медаль алуды мақсат етіп отырмыз», - дейді Мейрамбек.  77 келідегі кіл мықтыларды жүлдеден қаққан Асхат Ділмұхамедов әлем біріншілігін бар болғаны бесінші орынмен тәмамдады. Роман Власов пен Виктор Немешке көп күш жұмсаса керек, қазақ балуаны кіші финалда жеңіліс тапты. Қола медаль үшін күресте өзбекстандық Жалғасбай Бердімұратовтан айла асыра алмай, 1:3 есебімен жеңілген Асхат Олимпиада жолдамасын қанағат тұтады.  Осылайша, Бақтияр Байсейітов баптайтын грек-рим күресінен Қазақстан командасы өз еліміздегі доданы алтынсыз аяқтады. Чемпионат басталғанға дейін күрес мамандары мен балуандар елордамызда Әнұран шырқату қажеттігін көп айтқан. Десе де, Байсейітовтің 20 жыл бұрынғы жетістігін шәкірттері бұл жолы да қайталай алған жоқ. «Классиктер» әлем чемпионатынан бір күміс, екі қола және Олимпиаданың екі жолдамасын жеңіп алды.  Әлем чемпионатында әйелдер күресіне де кезек келді. Бүгін 50, 53, 55 және 72 келі салмақ дәрежесіндегі белдесулер өткен болатын.  53 келідегі Татьяна Ахметова алғашқы белдесуінде Беларусь балуанына есе жіберіп, турнирді тәмамдады. Ал 50 келідегі Валентина Исламова бұрымды балуандар арасынан алғаш болып Токио жолдамасына қол жеткізді. Исламова Франция, Беларусь және Түркия балуандарын қатардан шығарып, жартылай финалға жеткен болатын. Алайда, аса тартысты өткен белдесуде румыниялық Эмилия Вукпен тең түскен жерлесіміз финалдан сырт қалды. Соңғы ұпайды иеленген Эмилия ақтық сында айқасады. Валентина Исламова ертең қола медаль үшін кілемге шығады.  55 және 72 келіде ел намысын қорғаған Марина Седнева мен Жәмила Бақбергенова да жартылай финалға дейін сүрінбеген. Бірақ екі спортшымызға да финалда күресу бақыты бұйырмайды.  Марина жартылай финалда жапониялық Ирие Нанамиден, Жәмила Олимпиада чемпионы, ресейлік  Наталья Воробьевадан таза жеңілді. Ертең екі балуанымыз да қола жүлдеге таласады.  Ертең, 18 қыркүйек күні, Нұр-Сұлтандағы әлем чемпионатында әйелдер күресінен 57, 59, 65 және 76 келі салмақ дәрежесіндегі іріктеу айналымы басталады. 

Күрес түрлерінен әлем чемпионатының екінші жарыс күні «алтынсыз» аяқталды

«Барыс-Арена» кілемінде грек-рим күресінен 67, 87 және 97 келі салмақтағы балуандардың финалистері анықталса, 55, 62, 72 және 82 келіде чемпиондар мен жүлдегерлердің есімі белгілі болды.

16 Қыркүйек 2019 09:54 798

Күрес түрлерінен әлем чемпионатының екінші жарыс күні «алтынсыз» аяқталды

Фото: olympic.kz

Күрес түрлерінен Нұр-Сұлтандағы әлем чемпионатының екінші жарыс күні аяқталды. Сондай-ақ, әлем біріншілігінің салтанатты түрде ашылу рәсімі өтті, деп жазады Olympic.kz. 

15 қыркүйекте грек-рим күресінен олимпиадалық салмақ дәрежелеріндегі балуандар сынға түсті. Өкінішке қарай, Қазақстан сапынан кілемге шыққан үш балуанымыз да жүлде ауылынан алыс қалды.

67 келіде белдескен Мейіржан Шермаханбет бірінші белдесуде-ақ АҚШ балуанына есе жіберсе, 87 келідегі Азамат Күстібаев үшінші айналымда кубалық Дэниел Григоричтен ұтылды. 97 келідегі Ерұлан Ысқақов екінші кезеңде Грузия балуаны Георгий Мелиядан таза жеңілді. 

Қазақстандық балуандардың қарсыластары да ұзаққа шаппады. Сол себепті, бүгін өтетін жұбаныш белдесулеріне біздің спортшылар қатыспайды. Аталған салмақ дәрежесіндегі Олимпиада жолдамасын балуандар аймақтық іріктеу турнирінде алуға тырысады. 

Осыдан 20 жыл бұрынғы тарихи сәтті жаңғыртып, әлем чемпионатының алтынын алатын мүмкіндік болған еді. Алайда, 55 келідегі Қорлан Жақаншаға мұндай бақ бұйырмады. Кіл мықтыларды, оның ішінде 2018 жылғы әлем чемпионы Эльданиз Азизлиді жеңген Қорлан ақтық сында алтыннан көз жазып қалды. Қазақ балуаны грузиялық Нугзари Цурцумиядан ірі есеппен ұтылды.

Грек-рим күресінен Қазақстан командасының капитаны, тәжірибелі Алмат Кебіспаев бұл жолы да үздіктер қатарынан көрінді. Әу баста алтын алады деп үміт артқан балуанға жапондық Шинобу Ота алдырмаған болатын. Ота өзіне ешкімнің тең келмейтінін дәлелдеп, әлемдік сынның алтынын тағынды. Ал Алмат болса, өзінің жүлде қоржынына әлем чемпионатының үшінші қоласын салды. Кебіспаев кіші финалда 2018 жылғы әлем чемпионатының күміс жүлдегері, қырғызстандық Тынар Шаршенбековті 9:0 есебімен ұтты. 

Осылайша, қазақ балуандары әлем чемпионатының күмісі мен қоласын қоржынға салды. Талай жыл арманға айналған алтынның орны әлі де бос тұр. Мүмкін, бүгін кілемге шығатын Мейрамбек Айнағұлов (60 келі), Асхат Ділмұхаммедов (77 келі) және Темірлан Шадукаевтардың (130 келі) бірі жанкүйерді қуантар.