Теміртауда автобуста жолаушыны жарақаттаған ер адам қолға түсті, деп жазады inbusiness.kz сайты.
Қоғамдық көлікте екі жолаушы желдеткіш терезені ашу-ашпау туралы келісе алмай, жанжалдасқан. Текетірестің соңы төбелеске ұласқан көрінеді. Артынша ашуға мінген 30 жастағы азамат бозбаланы пышақпен жарақаттаған. Куәгерлер шұғыл түрде полиция мен жедел жәрдем шақырыпты.
Зардап шеккен жас жігітке медициналық көмек көрсетілді. Алдын ала мәлімет бойынша, оның өміріне қауіп жоқ.
– Тергеу мәліметтеріне сәйкес, күдікті мен жәбірленуші арасында қоғамдық көліктің терезесін ашуға байланысты келіспеушілік болып, салдарынан пышақ жарақатын салған. Қазіргі уақытта оқиғаның мән-жайын анықтау және толық тергеу әрекетін жүргізуге бағытталған тергеу амалдары жалғасуда", – деді облыстық Полиция департаментінің баспасөз хатшысы Бақытжан Құдияров.
