Olympic.kz еркін күрестен 86 келіде жеңімпаз және жүлдегер атанған спортшылар тізімін назарларыңызға ұсынады.
Шығыс Қазақстан облысының намысын қорғаған Дәулетбеков финалда Есқали Дәулетқазымен (Алматы облысы) белдескен болатын. Азаматтың айқын басымдығымен өткен кездесу 11:0 есебімен аяқталды.
Бұл салмақтағы қола медальді Нұрдәулет Көктеубаев пен Әділет Даулембаев иеленген.
"Мен үшін Қазақстан чемпионаты сәтті өтті. Бұл жарысты асыға күттік. Барлық балуандар бір-бірінің күресін жақсы біледі. Ақтық айқаста күресім жақсы жүрді. Конфедерация кубогінің финалында Есқалиден ұтылған едім. Осы жолы есемді қайтардым десем, артық емес. Қарсыластарым күресу мәнерімді жақсы білгендіктен, бәрі жаттап алады. Десе де, жеңіс менің еншімде қалды. Ғаламдық індетке қарамастан, дайындықты тоқтатқан жоқпыз. Менің салмағымда Олимпиада ойындарына лицензия алынған жоқ. Сол себепті, бапкерлер мені лицензиялық додаға қосады деп үміттенемін", – дейді Азамат Дәулетбеков.
Айта кетелік, бүгін еркін күрестен 57 және 61 келідегі ел чемпиондары анықталды.
