Ішкі істер министрлігі Halyk+ жалған платформасына қатысты алаяқтық туралы ескертіп отыр, деп хабарлайды inbusiness.kz сайты.
– Әлеуметтік желілерде deepfake арқылы банктердің бірінің басшысының бейнесі қолданылған бейнеролик таралуда. Бұл роликте азаматтарға Halyk+ деп аталатын инвестициялық платформаның көмегімен ірі көлемде ақша табуға болады деген жалған ақпарат айтылады, – делінген хабарламада.
Министрлік өз кезегінде мұндай платформаның жоқ екенін мәлімдейді. Таралып жатқан ақпарат жалған және азаматтарды адастыруға бағытталған. Бұл ақшалай шығынға да әкелуі мүмкін.
Негізінен, азаматтар кез келген белгісіз онлайн-платформалар арқылы ақша салу туралы ұсыныстардың алаяқтық тәуекелі жоғары екенін естен шығармауы керек. Қауіпсіздік мақсатында қаржылық операцияларды тек банктердің ресми бөлімшелеріне жеке барып жүргізген жөн.
– Егер сіз осындай материалдарды байқасаңыз немесе алаяқтардың құрбаны болсаңыз, дереу ішкі істер органдарына хабарласыңыз, – деп жазады ІІМ.
Министрлік азаматтарды әлеуметтік желілердегі күмәнді бейнероликтер мен жарияланымдарға сенбеуге, белгісіз сілтемелерге өтпеуге, жеке деректерді үшінші тұлғаларға бермеуге және ақпаратты тек ресми дереккөздер арқылы тексеруге шақырады.
