Мемлекет басшысының тапсырмасына сай туризм және спорт Министрлігі өткен Азия ойындарының қорытындысы бойынша спорт түрлерінен федерациялардың есебін тыңдауға кірісті.
Спорт функционерлері палуандардың көрсеткен өнері туралы, сондай-ақ орын алған жағдайды баяндады.
Есеп беру жиынына грек-рим күресінен бас жаттықтырушы Юрий Мельниченко қатыспады. Туризм және спорт министрі федерация басшылығына осы мәселе бойынша ескерту жасап, спортшыларымыздың қанағаттанарлықсыз өнер көрсеткенін атап өтті. Ол спортшылардың әлсіз функционалды және физикалық дайындығына ерекше тоқталды.
"Бірінші периодта күреседі, ал екінші кезеңде демігіп қалады. Жеке дайындық бағдарламасы жоқ. 2024 жылғы Париж олимпиадасында медальға ілігеді деген спортшылардың тізімін құрып, оларға толыққанды жағдай жасау қажет", - деп атап өтті Ермек Маржықпаев.
Палуандардан кейін су спорты федерациясының өкілдері есеп берді. Су добынан еліміздің әйелдер құрама командасы қола медальді еншілеп, алға қойған жоспарды орындап шықты.
Ерлер құрамасы – Азия ойындарының бірнеше дүркін чемпиондары бола тұра финалға өте алмады, олар да қола жүлдені місе тұтты. Нәтижесінде 3-орын ватерполшыларымызды алдағы Олимпиадаға берілетін лицензиядан шеттетті.
Бас бапкер Дамир Темірханов Ханчжоудан бір жыл бұрын команда жартылай жаңартылғанын атап өтті. "Көптеген негізгі ойыншылар жасы келгендіктен ұлттық құрамадан тыс қалды, жастар келді, сол себепті ішкі ара ойын өрнегі бұзылды", - деді ол. Енді ұлттық құрамамыз алдағы әлем чемпионатында Парижге берілетін тағы бір мүмкіндік үшін сынға түседі.
Министр суда жүзушілер есебіне қанағаттанарлық баға берді. Азиадада 2 медаль алу жоспары орындалды. Ұлттық құраманың бас бапкері Илья Гусаков алдағы маусымға арналған бағдарламасын ортаға салып, жоспарымен бөлісті. Ол команда мүшелерінің орташа жасы 16-17 жас екенін және оларға үлкен үміт артатынын атап өтті.
