Азық-түлік қауіпсіздігі бойынша әлемдік рейтингіде Қазақстан 113 мемлекеттің ішінде 48-орынға жайғасты. Мұнда еліміздің тамақ өнімдері бойынша индексі 67,3-ті құрады. Бір жыл бұрын еліміз 57-ші сатыда болған, деп хабарлады еnergyprom.kz.
Биыл 9 сатыға жоғарылады. Жалпы индекс мемлекетті тек азаматтардың табысы мен азық-түліктің бағасы бойынша емес, нарықтағы қажетті тамақ өнімдері, олардың сапасы, түрлеріне байланысты 34 талап бойынша саралайды.
Ал рейтингіде алдыңғы қатарлы 5 елдің ішінде Сингапур, Ирландия, АҚШ, Швейцария және Финляндия бар.
Көрші мемлекеттер ішінде Ресейдің көрсеткіші бізден жоғары. Ал Әзербайжан, Өзбекстан және Тәжікстан керісінше елімізден төменірек орналасқан.
2020 жылдың қаңтар-қазанында елімізде 1,6 трлн теңгеге азық-түлік өнімі шығарылды. Бұл өткен жылдың сәйкес кезеңінен 17,5%-ға жоғары.
Өңірлер бойынша ең жоғары көрсеткіш Алматы облысына тиесілі. Мұнда көрсеткіш 26,5%-ға өсіп, 232,6 млрд теңгеге өнім шығарылған. Одан кейінгі орында Костанай облысы (202 млрд теңге, + 27%) және Алматы қаласы (196,5 млрд теңге, + 9,8%).
Қазан айының қорытындысы бойынша өнімдердің бағасы бір айда 0,8%, бір жылда 10,7% өскен. Оның ішінде жұмыртқа – 18,8%, жемістер мен көкөністер – 13%, нан өнімдері – 12%, майлар – 12%, балық – 10,9%, ет және ет өнімдері –9,5%, сүт өнімдері – 9,1%, қант 9,1%-ға қымбаттады.
Тамақ өнімдері тез арада қымбаттаған өңірлер көшін Шымкент, Қызылорда мен Павлодар облыстары бастайды.
Құралай Құдайберген
