5 ақпан күні Байқоңыр ғарыш айлағынан 2023 жылдың алғашқы ұшырылымы жасалады, деп хабарлайды inbusiness.kz.
Бүгін, 2 ақпанда "Электро-Л" спутнигі бар "Протон-М" зымыран тасығышы монтаждау-сынақ корпусынан шығарылды және теміржол рельстері арқылы ғарыш айлағының 81-ші алаңының ұшыру кешеніне жеткізілді.
"Роскосмос" кәсіпорнының мамандары техникалық жабдықты тексеруге және тестілеуге кіріседі. Сондай-ақ, зымыранды вертикалды күйге келтіру жүргізіледі.
"Электро-Л" сериялы ресейлік ғарыш аппараттары ауа райының болжамдарын зерттеуге, авиацияларды ұшыру жағдайына анализ жасауға, сондай-ақ теңіздер мен мұхиттар акваторияларын, төтенше жағдайлар ахуалын мониторингілеуге арналған.
Роскосмос баспасөз қызметінің мәліметінше, қазір жер орбитасында 2011 жылдан бері жұмыс істеп келе жатқан "Электро" ғарыш жүйесінің тобында екі спутник — №2 "Электро-Л" және №3 "Электро-Л" пайдаланылып жатыр.
