Азаматтардың ұялы байланыс операторлары қызметтерінің бағасын көтеру туралы жиі өтініштеріне байланысты Бәсекелестікті қорғау және дамыту агенттігі ұялы байланыс және мобильді интернет қызметтерінің 2020-2021 жылдарға арналған тарифтеріне талдау жасады, деп жазды inbusiness.kz.
"Қазақтелеком" АҚ тобының (35%-дан астамы) үстем тариф белгілегені анықталды. Оның құрамына "Кселл" АҚ және "Мобайл Телеком-Сервис" ЖШС кіреді. Талданған кезеңде "Кселл" АҚ ұялы байланыс (орта есеппен 756 теңге) және мобильді интернет (орта есеппен 1 765 теңге) үшін ең жоғары бағаны белгілеген", – деп хабарлады Бәсекелестікті қорғау және дамыту агенттігі.
Мысалы, кейбір операторлар үшін ұялы байланыс қызметінің ең төменгі бағасы орташа есеппен 332 теңгені, мобильді интернет қызметтері үшін орташа есеппен 1 022 теңгені құраған.
"Кселл" АҚ-ға қатысты ұялы байланыс қызметтері мен мобильді интернетке монополиялық жоғары бағаларды белгілеу бойынша тергеу жүргізілуде.
"Сонымен қатар 2020-2021 жылдарға арналған SMS-хабарлама қызметтері нарығындағы баға мониторингінің нәтижелері бойынша Бәсекелестікті қорғау және дамыту агенттігі басқа байланыс операторларымен салыстырғанда "Мобайл Телеком-Сервис" ЖШС бағасының жоғары болғанын анықтады. Байланыс операторлары 2021 жылы 2020 жылмен салыстырғанда SMS жіберу тарифтерін орта есеппен 14,03%-ға өсірді. Бағаның ең жоғары өсу қарқыны "Мобайл Телеком-Сервис" ЖШС мен "Кселл" АҚ-да тіркелді", – деп хабарлады Бәсекелестікті қорғау және дамыту агенттігі.
"Мобайл Телеком-Сервис" ЖШС-ге қатысты тергеу SMS жіберу қызметіне монополиялық жоғары баға белгілеу фактісі бойынша ашық.
