Балалар денсаулығын сақтауға бөленетін бюджет қаржысы көбейеді. Бұл туралы Алматыдағы медицина қауымдастығымен өткен кездесуде денсаулық сақтау министрі Елжан Біртанов мәлімдеді, деп хабарлайды Atameken Business.
Министрдің сөзінше, қазір алдағы 5 жылға арналған мемлекеттік бағдарламасы әзірленіп жатыр. Оны жасауға үздік сарапшылар, жаңашыл мамандар қатысуда. Бағдарламаның басты бағыттары медициналық қызмет сапасы мен дәрігерлердің мәртебесін көтеру. Сондай-ақ, технологиялық трансформация мен цифрландыруға басымдық беріледі.
"Бұл мемлекеттік бағдарламаның негізгі бағыты – балалық шаққа инвестиция жасау. Яғни балалардың денсаулығын күшейтуді басты назарға аламыз. Қазір бұл мақсатқа қанша ақша керек екенін есептеп жатырмыз. Бала тууды жоспарлаудан бастап, мықты әрі сапалы адам капиталын қалыптастыру – біздің жаңа бағдарламаның басты міндеті болып отыр",– дейді ҚР денсаулық сақтау министрі Елжан Біртанов.
