Астана қаласында Министрліктер үйі маңайындағы көпірден әйел секірмек болды, деп жазады inbusiness.kz
"Дильмира Маймакованың ұлы қамауда жатқанына жарты жыл болды. Оның баласын заңсыз 7 жыл 3 айға соттағалы жатыр. Барлық дәлелді анасы апарып тұр, бірақ сот құлақ аспай жатыр. Прокурор, сот бәрі бірігіп алған. Мына жақта қарапайым халықты ешкім тыңдап жатқан жоқ. Біз талай рет ол баланың сотына қатыстық. Қаншама әділетсіздікті көріп отырмыз. Талай инстанциялардың табалдырығын тоздырып, құжаттар тапсырдық. Оның ешқайсысын қабылдап не қарастырмады. Сол себептен Қазақстанда әділдік жоқ деп осындай қадамға барып отыр", - деді әйелдің құрбысы Адина Филипова.
Айтуынша, Дильмира Маймакованың қамаудағы баласы жерде жатқан белгісіз біреудің телефонын алған.
"Кейіннен телефон иесі бірнеше күннен кейін қайтыс болады. Оның өлімін 18 жастағы екі баладан көріп отыр. Сол себепті қамаған. "Адам өлді, сендер өлтірдіңдер" деп біреудің өлімін екі балаға жауып отыр. Дильмира Маймакованың 5 баласы бар. Қамауда отырғаны – ең үлкені. Ол 17 жаста болған кезде мойнына осы істі ілген. Қазір ұлы он сегізге толды. Оперлар ұстап алып, баланы ата-анасының қатысуынсыз сұрақтың астына заңсыз алған. Олар балаларды қорқытып, "қайтыс болған адамды ұрдық, қабырғасын сындырдық деп айтыңдар, содан кейін сендерді жібереміз" деген. Балалар амалсыздан мұны бейнежазбаға айтқан", - деді Адина Филипова.
Оқиға орнында болған "Қазақ өзбек диаспорасы" республикалық қоғамдық бірлестігінің өкілі сот ісіне араласа алмайтындарын жеткізді.
"Біздегі мақсат – адам құқығын қорғау, оны шектемеу. Біздің тарапымыздан қажет көмекті көрсетейік. Мұндай заңсыздықтарға бармаңыздар", - деді "Қазақ өзбек диаспорасы" республикалық қоғамдық бірлестігінің өкілі Әлжан Қожа.
"26 шілде күні сағат 12.16-да "102" арнасына Мәңгілік Ел көшесіндегі көпірдің қоршауында әйелдің тұрғаны және оның секіргісі келетіні туралы хабарлама келіп түсті. Төтенше жағдайлар бөлімінің қызметкерлері әйелдің бұл әрекетінің алдын алды. Әйел осылайша кәмелетке толмағандардың істері жөніндегі мамандандырылған ауданаралық соттың үкімімен келіспейтінін түсіндіргісі келгенін айтты. Сот органының үкіміндегі кәмелетке толмағандардың бірі оның ұлы екені анықталды. Ол осы жылдың 6 сәуірінде ҚР ҚК 191-бабының 2-бөлігі (Тонау) және 192-бөлігі 3 (Қарақшылық) бойынша сотталған", - деп хабарлады Астана қалалық полиция департаменті.
Бұдан бөлек қоғамдық тәртіпті бұзған әйелге қатысты ҚР ӘҚБтК 434-бабы бойынша әкімшілік хаттама толтырылды.
