Бангладеште оқу-жаттығу ұшағы Дакка қаласының солтүстігіндегі мектеп пен колледж аумағына құлап кетті, деп хабарлайды inbusiness.kz сайты Euronews-ке сілтеме жасап.
Басылымның жазуынша, кем дегенде 19 адам қаза тапты, жарақат алғандар да бар. Prothom Alo газеті жарақат алғандардың басым бөлігі студенттер екенін жазды.
Апатқа ұшыраған F-7 BGI ұшағы Әскери-әуе күштеріне тиесілі екені белгілі болды.
Ұшақ Уттара ауданында орналасқан мектеп пен колледждің аумағына құлаған. Апат кезінде оқушылар емтихан тапсырып, сабақтарына қатысып жатқан.
50-ден астам адам ауруханаға жеткізілді.
Associated Press агенттігіне берген сұхбатында Рафика Таха есімді оқушы апат кезінде мектепте болмағанын айтқан. Оның айтуынша, Milestone мектеп-колледжінде шамамен 2000 оқушы білім алады. Бұл оқу орнында бастауыш сыныптан бастап 12-сыныпқа дейінгі сыныптар бар.
"Теледидардан болған оқиғаны естіп қатты шошыдым. Бұл – менің мектебім", – деді ол.
