Қаржы ұйымдары 2 жыл ішінде кассалық операцияларды жүзеге асыруға арналған үй-жайларды халықаралық стандарттарға сәйкестендіруге тиіс. Бұл туралы Ұлттық банк жариялаған ақпаратта жазылған, деп хабарлайды inbusiness.kz сайты.
Ұлттық Банк 2020 жылғы 24 ақпандағы № 14 Басқарма өзгерістер енгізілгенін хабарлады.
Ақпаратқа сәйкес, бұл өзгерістер (кассалық торап үй-жайларына қатысты) жекелеген нормаларды үй-жайларды бұзу және ену қатерлерінен қорғаудың өзекті әдістері көрсетілген ұлттық және мемлекетаралық стандарттардың талаптарына сәйкес келтіру аясында енгізілді.
"Жаңартылған талаптар кассалық торап үй-жайларындағы терезе ойықтарын қорғау мақсатында орнатуға рұқсат етілген жабдықтардың тізбесін кеңейтуді, сондай-ақ сейф бөлмелеріне қойылатын қауіпсіздік талаптарын өзектендіруді көздейді. Бұл шаралар қызметкерлердің қауіпсіздігін арттыруға, құндылықтарды сақтауға және үй-жайлардың эстетикалық келбетін қамтамасыз етуге бағытталған. Бұл ретте, енгізілетін өзгерістерге сәйкес үй-жайларды бейімдеу қаржы ұйымдарының шығыстарына тікелей әсер ететінін ескере отырып, өтпелі кезең көзделген. Яғни, қаржы ұйымдары 2 жыл ішінде (ресми жарияланған сәттен бастап) кассалық операцияларды жүзеге асыруға арналған үй-жайларды сәйкестендіруге тиіс", – делінген хабарламада.
Сондай-ақ, Ұлттық пошта операторы қызметінің әлеуметтік құрамдас бөлігін ескере отырып, оған қатысты жеке өтпелі кезең 5 жыл ішінде көзделді.
