AQR (Asset Quality Review) бойынша банк активтерінің сапасына байланысты алғашқы нәтижелер белгілі болды. Бұл туралы Ұлттық банк төрағасы Ерболат Досаев мәлімдеді.
"Қазір бизнес-процестерді жақсарту бойынша халықаралық тәжірибелер негізінде ұсыныстар дайындалуда. Оның ішінде несиелік құжаттамалар мен кепілді қамтамасыз ету сынды бағыттар негізінде жұмыстар жүргізілуде",-деді Ұлттық банк төрағасы.
Ерболат Досаевтың сөзінше, AQR-дың сандық және сапалық нәтижелері SREP (Supervisory review and evaluation process) қадағалау жүйесіне көшіріледі. Оның ішінде банк капиталына қадағалау үстемесін қосу сынды жаңа бақылау тетігін пайдалану бар.
"AQR-ды уақытылы өткізгенімізді Ұлттық банк қана емес, өзге де халықаралық қаржы ұйымдары мен тексерістен өтіп жатқан банктер де мойындауда. Қаржы институттары бұл құралды пайдалану болашақ үшін өте маңызды екенін түсінді",-деді Ерболат Досаев.
Естеріңізге сала кетсек, Ұлттық банк 1 тамызда банктердік активтер сапасын бақылауды бастады. Аталған тексеріс желтоқсан айында аяқталады деп хабарланған болатын.
