Ұлттық банктің бастамасы бойынша 2018 жылғы 16 шілдеден бастап банктер туралы заңға ипотекалық қарыз беруге және оған қызмет көрсетуге байланысты банк шотын жүргізгені үшін банктердің комиссиялар белгілеуіне және алуына, сондай-ақ Заңның нормасы қолданысқа енгізілгеннен кейін жеке тұлғалармен жасасқан ипотекалық қарыз шарттары бойынша банк шотына қарызды есепке алуға тыйым салу енгізілді, деп хабарлайды бас банктің баспасөз қызметі.
Бұл комиссиялар тізбесін оңтайландыру және қарыз алу және оған қызмет көрсету кезінде қарыз алушылардың шығыстарын қысқарту шеңберінде жасалып отыр.
Кәсіпкерлік қызметпен байланысты емес барлық жеке тұлғаларға қатысты қарыз беруге және оған қызмет көрсетуге байланысты банк шотын жүргізгені үшін, сондай-ақ банк шотына қарызды есепке алу үшін комиссияларды жою туралы осындай норма қазіргі кезде Қазақстан Республикасының парламенті мәжілісінің қарауындағы "Қазақстан Республикасының кейбір заңнамалық актілеріне меншік құқығын қорғауды күшейту және төрелік мәселелері бойынша өзгерістер мен толықтырулар енгізу туралы" Заң жобасында қамтылған.
Комиссиялардың тізбесі 2016 жылғы 1 шілдеден бастап жасалған банктік қарыз шарттарына, яғни ол қолданысқа енгізілген күннен бастап қолданылады. Бұл ретте жеке тұлғалармен 2016 жылғы 1 шілдеге дейін жасалған банктік қарыз шарттары бойынша банктер, банктер туралы заңның 39-бабына сәйкес, банктік қарыз шартында көрсетілген және операциялар жүргізудің жалпы талаптары туралы қағидаларда белгіленген комиссияларды алуға құқылы.
