Бас мүфти Ержан қажы Малғажыұлы Ғұламалар кеңесінің XVI мәжілісінде медреселердегі діни білім беру бағдарламаларына сай оқулықтар мен оқу құралдарын әзірлеуді тапсырды, деп хабарлайды ҚМДБ баспасөз қызметі.
"Медіреселерімізге қазіргі заманғы талаптарға және қоғамның рухани сұранысына сай келетін білім беру жүйесі қажет. Білікті маман шығару үшін білім беру жүйесін жетілдіру, оны заман талабына сай оңтайландырып отыру міндет. Діни басқарма осы бағытта елімізде діни білім беруді дамытудың тұжырымдамасын қабылдады. Біз білім саласын жандандыру үшін ҚМДБ-ға қарасты медреселердің оқу бағдарламаларын тұжырымдама аясында жүзеге асырып келеміз. Осы тұжырымдамаға сәйкес медреселерде діни білім беру бағдарламаларымен "ислам тарихы", "ислам әдебі", "салыстырмалы діндер тарихы", "Қазақстандағы ислам тарихы", "әдет-ғұрып заңдары", "хадис әдістемесі", "тәпсір әдістемесі", "ислам мәдениеті" кітаптарын әзірлеуді діни білім және кадр дайындау бөліміне тапсырамын", – деді бас мүфти.
Қазақстан мұсылмандары діни басқармасы исламдық білім беру жүйесін дамыту бағытында үздіксіз жұмыс істеп келеді. Қоғамдық маңызды фактор ретінде діни білім беру жүйесін үнемі жетілдіріп келеді. Жақында діни басқарма діни оқу-ағарту саласында Қазақстан Республикасы Білім және ғылым министрлігімен меморандум жасап, екі жақты келісім құжаты аясында алғаш рет медреселерге мемлекеттік стандартқа сай оқу жоспары мен оқу бағдарламалары әзірленді. Сонымен қатар медресе жарғыларына өзгеріс пен толықтыру енгізілген болатын.
