– Сіздерді он екі айдың сұлтаны – қасиетті Рамазан айының келуімен шын жүректен құттықтаймын! Бұл ай – береке мен бірліктің, рухани тазару мен сауап алудың ерекше мүмкіндігі. Әр шаңыраққа амандық, бақыт және тыныштық тілеймін! – деді бас мүфти.
Шариғат бойынша балиғат жасына жеткен, ақыл-есі дұрыс әрбір мұсылманға Рамазан айында ораза ұстау – парыз. Дегенмен, белгілі бір жағдайларда жеңілдіктер қарастырылған.
– Қасиетті Құранда: "Уа, иман келтіргендер! Өздеріңе дейінгі қауымдарға парыз етілгендей, тақуалыққа жетулерің үшін сендерге де ораза ұстау парыз етілді" ("Бақара" сүресі, 183-аят) деп айтылған. Алайда жолаушылар, ауыр сырқатқа шалдыққан немесе ауруының асқынуынан қауіптенген жандар, жүкті және емізулі баласы бар аналар оразаны кейінге қалдыра алады. Бұл – шариғаттың рұқсаты, – деді Наурызбай қажы Тағанұлы.
Рамазан – Алланың рақымы төгіліп, пенделерге сауап жинауға берілген мүмкіндік айы.
– Бұл – Жаратушының ұлы нығметі. Бұл айда жасалған әрбір игі амал еселеніп жазылады. Ауыз бекіткен пендеге берілетін сауапты тек Алла Тағала ғана өлшейді. Құдси хадисте: "Аузы берік адам ішіп-жеуден Мен үшін тыйылды. Ораза – Мен және құлымның арасындағы құлшылық. Оған берілетін сыйды Мен ғана беремін" делінген, – деп атап өтті бас мүфти.
Сондықтан мұсылман қауым бұл айда рухани тазаруға, сабыр мен төзімділікке, игі істерге бет бұруы қажет.
Ораза – тек ішіп-жеуден тыйылу ғана емес, ол рухани кемелдену, нәпсіге тоқтау салу, мінезді көркемдеу айы.
Бас мүфти қасиетті айда қайырымдылық жасауға ерекше мән беру керектігін атап өтті.
– Денсаулығы немесе жасы келгендіктен ораза ұстауға шамасы жетпеген адамдар ауыз бекіткен жандарға ауызашар берсе, үлкен сауапқа кенеледі. Пайғамбарымыз (оған Алланың салауаты мен сәлемі болсын): "Алла Тағала ең болмаса бір түйір құрма, тіпті бір ұрттам сумен болса да ауызашар бергенге сауап жазады" деген, – деді ол.
Сондай-ақ, кәсіпкерлерге Рамазан айында азық-түлік бағасына жеңілдіктер жасауға, қоғамдық тамақтану орындарын ауызашар уақытында халыққа ыңғайлы бағамен қызмет көрсетуге шақырды.
– Бұл айда әрбір жақсылықтың еселеніп жазылатынын ескеріп, қайырымды істерге атсалысайық. Дүкендерде арақ-шарап сатылмаса деген тілегімізді де жеткіземіз. Берекелі айда елімізге амандық, жұртымызға тыныштық тілейміз! Рамазан айы мүбәрәк болсын! – деп түйіндеді бас мүфти.
