Бас прокуратура елімізде экстремистік деп танылған "Қазақстанның демократиялық таңдауы" ұйымының (ҚДТ) акцияларға шақыруларына қатысты үндеу жариялады.
"Аталған ұйымның мүшелері аса ауыр қылмыстар жасағаны үшін шетелде сот төрелігінен жасырынып жүр.Олар тұрғындарды құқыққа қарсы іс-әрекеттерге айдап салып, адамдардың қауіпсіздігіне, олардың өмірі мен денсаулығына, мүлкіне залал келтіру, қоғамның қалыпты тіршілік әрекетін бұзу қауіпін туындатуда",– деп ескертеді бас прокуратура.
Рұқсат етілмеген наразылық акцияларының ұйымдастырушылары мен қатысушылары заң алдында жауап береді.
"Заңсыз акцияларға қатысу фактілері расталған жағдайда құқық бұзушыларға қатысты Қазақстан Республикасы Әкімшілік құқық бұзушылықтар туралы кодексінің 488-бабы бойынша жауапкершілік мәселесі қойылатын болады (50 АЕК-ке дейін айыппұл, 15 тәулікке дейін қамаққа алу)",– делінген ведомствоның үндеуінде.
Бас прокуратура азаматтарды арандатушылық шақыруларға алданбауға және экстремистік ұйымдардың заңсыз акцияларына қатыспауға шақырады.
