Кеше оңтүстік аймаққа арналған жалпы қуаты 10 МВт жел электр станциялары жобаларын іріктеу бойынша сегізінші аукцион өтті, деп хабарлайды энергетика министрлігінің баспасөз қызметі.
3 компаниядан 3 өтінім келіп түсті, жобалардың бірлік қуаты 4,95-тен 10 МВт-қа дейін. Өтінімдердің жалпы көлемі 19,95 МВт құрайды. Аукциондағы бастапқы баға – 22,68 теңге/ кВт/сағ. 3 сағаттық сессия ішінде тарифтердің ұсынылған диапазоны 22,67 тг/ кВт/сағ-тан 22,65 тг/ кВт/сағ. дейін болды.
Аукционда бақылаушылар ретінде ҚР энергетика министрлігінің, үкіметтік емес сектордың және халықаралық ұйымдардың өкілдері қатысты. Бақылаушылар бәссауданы ұйымдастырушы – "Электр энергиясы мен қуаты рыногының қазақстандық операторы" АҚ-ның электронды сауда жүйесі жұмысының толық ашықтығын атап өтті.
Электронды сауда-саттық қорытындысы бойынша "Alcor Energy" ЖШС мен "Восток Ветер" ЖШС жеңімпаз боды.
Келесі аукцион 2018 жылғы 6 маусымда өтеді.
Айта кетсек, Қазақстанда 2018 жылдың 23 мамырынан 7 маусымына дейін және 3-18 қазан аралығында жаңартылатын энергия көздері жобаларын іріктеу бойынша 1-халықаралық аукциондық сауда-саттықты өткізу жоспарлануда.
Аукциондық сауда-саттық, жаңартылатын энергия көздерін жоспарлы дамыту кезеңдерінің бірі бола отырып, ең тиімді жобаларды іріктеуге және жаңартылатын энергия көздері объектілері арқылы өндірілетін электр энергиясына нарықтағы бәсекелес бағаны қалыптастыруға бағытталған.
