Батыс елдері Киевке өз аумағында украиндардың әскери міндеттілерін іздеуге көмектесуден және оларды Украинаға жіберуден бас тартты, деп хабарлайды inbusiness.kz сайты Bloomberg агенттігіне сілтеме жасап.
Агенттік ақпаратына сәйкес, Украина президенті Владимир Зеленский осы мәселе төңірегінде екіжақты кездесулер аясында одақтастарына қолқа салған. Алайда, басылымның айтуынша, Польшадан Венгрияға дейінгі елдердің саясаткерлері соғыс жүріп жатқан кезде украиндық босқындарды Отанына жібермейтінін мәлімдеді.
Bloomberg атап өткендей, батыс елдері босқындарды гуманитарлық алғышарттардан бөлек, экономикалық себептерден - жұмыс күшінің жетіспеушілігі салдарынан қабылдайды. Атап айтқанда, соғыс басталғанға дейін мыңдаған украиндық ер адамдар Польша мен Чехияда жұмыс істеді. Ресейлік агрессия басталғаннан бері көптеген адамдар ұрысқа қатысу үшін отанына оралды. Жұмыс күшінің кетуі құрылыс және көлік сияқты салаларда қатты сезіле бастады.
