Тиісінше, әкім биыл жаңа жылға шырша сатып алмайтынын жеткізді, деп жазады inbusiness.kz сайты.
Орталық коммуникациялар қызметі алаңында өткен брифингте облыс басшысы Нариман Төреғалиев мерекелік іс-шаралардағы шығындар жөнінде хабарлаған.
– Облыс бойынша 12 аудан мен 1 қаладағы безендіру жұмыстарына 28 миллион теңге бөлінген. Бізде мен бұл қызметке келгенге дейін сатып алынған шыршалар бар, соларды биыл да қолданамыз. Сәйкесінше, жыл сайын жаңа шырша сатып алып жүрмейміз, – деді ол.
Бұған дейін мәжіліс депутаты Асхат Аймағамбетов аймақтағы жедел жәрдем көліктерінің 82%-ы тозғанын еске салып, "отшашуға ақша бар, бірақ көлікті жаңартуға қаржы жоқ" деп сынаған болатын.
Нариман Төреғалиев барлық шығын осы 28 миллионның ішінде екенін, мұны 12 аудан мен 1 қалаға бөлгенде түк болмай қалатынын айтып отыр.
– Отшашуды да осы 28 миллион теңгеге сатып аламыз. Сонымен қатар, осал топтан шыққан балаларға табысталатын сыйлықтар алынады. Жыл сайын мұқтаж және ерекше балаларды қалаға шақырып, іс-шара өткіземіз. 12 аудан мен 1 қалаға бөлгенде бұл қаржы түк емес, – деп түйіндеді сөзін әкім.
Айта кетейік, былтыр Батыс Қазақстан облысында отшашуларға 32 миллион теңге қаралған еді.
