Батыс Қазақстан облысында 42,5 тонна мал азығы жанып кетті, деп хабарлайды БҚО ТЖ департаментінің баспасөз қызметі.
Оқиға 14 қыркүйек күні кешкісін Теректі ауданы Теректі ауылында болған.
"Сағат 19.23-те Бойная көшесі 30-мекенжайында 25 тонна шөп (100 рулон) пен аумағы 15 шаршы метр қора отқа оранды. Күшті желдің салдарынан жалын көршілес орналасқан Горький көшесі 15/1-үйдің ауласына ауысты. Мұнда 17,5 тонна (70 рулон) пішен мен 40 шаршы метр қора жанды. Өртті сөндіруге 19 адам (6 техника) жұмылдырылды. "Тілсіз жау" сағат 21.30-да оқшауланып, 15 қыркүйекте 00.55-те толықтай ауыздықталды. Зардап шеккендер жоқ. Қазіргі кезде өрттің шығу себебі келтірілген шығын анықталу үстінде", – деп хабарлады ведомстводан.
Жыл басынан бері облыс бойынша барлығы 378 өрт тіркелді.
