Батыс Қазақстанда карантин 15 маусымға дейін ұзартылды

Батыс Қазақстанда карантин 15 маусымға дейін ұзартылды

Өңірде ауру жұқтыру деңгейі әлі де төмендемей отыр.

23 Мамыр 2020 18:57 180

Батыс Қазақстанда карантин 15 маусымға дейін ұзартылды

БҚО бас мемлекеттік санитар дәрігерінің қаулысына сәйкес, карантин шектеу шаралары 15 маусымға дейін ұзартылды, деп хабарлайды ҚазАқпарат.

БҚО тауарлар мен көрсетілетін қызметтердің сапасы мен қауіпсіздігін бақылау департаменті басшысының орынбасары Нұрлыбек Мұстаев брифингте мәлім еткендей, өңірде аурушаңдық деңгейі әлі де төмендемей отыр.

Күн сайын эпидемиологиялық ахуалға мониторинг жүргізіледі. Мысалы, 22 мамырда коронавирус жұқтыру өсімі - 2,8 пайыз болса, одан бір күн бұрын - 2,5, апта ішінде 3,8-4 пайызды көрсетті.

Карантинді созудың тағы бір себебі – коронавирус жұқтырғандардың көпшілігі (340) Орал қаласында тіркелсе, індет аудандарда да таралып отыр.

Мысалы, Ақжайық ауданында 5 адам сырқаттанды. Мұнда ауырған медицина қызметкерімен қарым-қатынаста болғандар ауру жұқтырып, сол үй карантинге жабылды.

Бөрлі ауданында 7 адам ауырса, соның алғашқысы 29 наурызда тіркелген еді. Бұдан кейін Теңіз кенішінен келген адамнан 4 кісіге жұғып, олар облыстық жұқпалы аурулар ауруханасына жатқызылды. Өткен тәулікте «Қарашығанақ Петролиум Оперейтинг б.в.» компаниясының қызметкері де ауру жұқтырғаны белгілі болды. Ол вахталық жұмысқа кіріспестен бұрын Орал қаласында Теңіз кенішінен келген өзінің туысқанымен байланыста болғандықтан, карантиндік стационарға түскен болатын. Бастапқыда тест теріс нәтиже көрсеткенімен, кейін коронавирустың белгілері (дене қызуының көтерілуі, жөтел) пайда болып, провизорлық стационарға ауыстырылды. Науқас тұрған бұл үйге де карантин жарияланды.

Бәйтерек ауданында 3 оқиға тіркелсе, бұлар да – бұрын Теңіз кенішінен келген азаматпен қарым-қатынаста болғандар.

Сырым ауданында аурулар саны 4-ке жетті. Мұнда аудандық аурухана қызметкерінен өз туысқандарына жұққан. Тағы біреуі – науқаспен қарым-қатынаста болған медицина қызметкері. Бұл дерек бойынша эпидемиологиялық тексеру жұмыстары жалғасуда. Өйткені ауру көзі болған аурухана қызметкерінің Оралда да болғаны анықталып отыр.

Қазіргі таңда Сырым ауданында карантин жарияланып, індетке қарсы күрес жалғасуда.

Тасқала ауданында 10 адамның бесеуі – медицина, үшеуі – полиция қызметкері.

Сондай-ақ Теректі ауданы Подстепный ауылында дәрігерлік амбулатория қызметкерінің ауру жұқтырғаны анықталды. Ол да Теңіз кенішінен келген азаматпен қарым-қатынаста болған. Дәрігерлік амбулаторияда толығымен залалсыздандыру жұмыстары жүргізілді.

Күні бүгін облыста 370 науқас тіркелсе, соның 144-і облыстық жұқпалы аурулар ауруханасында емделуде. 220 адам жазылып шықты.

Науқастардың 67 пайызы (251 адам Ресей мен Атыраудан) – сырттан келгендер. 114-і – бұрын ауырғандармен қарым-қатынаста болғандар.

Сонымен қатар 24 адам провизорлық, 217 адам карантиндік стационарда жатса, 1208 адам үйлерінде оқшаулануда.

«Егер 15 маусымға дейін аурушаңдық деңгейі 2 пайыздан төмендесе, карантиндік шектеу шаралары жеңілдетілуі мүмкін. Бәрі де адамдардың санитарлық талаптарды бұлжытпай сақтауына байланысты. Айталық, кейбіреулер ауру белгілері байқалғанын дәрігерлерден жасырады. Тек ауру дендеген кезде ғана айтады. Немесе жедел жәрдем шақырудың орнына өздері медициналық мекемеге барып, таралу қаупін ұлғайта түседі», – деді Нұрлыбек Мұстаев.

inbusiness.kz-ті қараңыз, оқыңыз :

Коронавирус жұқтырған жолаушысы бар ұшаққа Алматы әуежайында жанармай құйылды

Әуе кемесіне жанармай құюда жарлық қауіпсіздік шарасы сақталды. 

25 Қаңтар 2020 17:07 436

Коронавирус жұқтырған жолаушысы бар ұшаққа Алматы әуежайында жанармай құйылды

Сенбіде коронавирус жұқтырған жолаушысы бар Ыстамбұл-Ухань-Ыстамбұл бағыты бойынша чартерлік рейс жасаушы ұшаққа Алматы әуежайында жанармай құйылды, хабарлайды қала әкімдігінің баспасөз қызметі.

«25 қаңтарда TCCJ чартерлік рейсі бойынша Ыстамбұл-Ухань-Ыстамбұл бағытында ұшып бара жатқан ұшаққа  Алматы әуежайында жанармай құйылды. Қолда бар ақпаратқа сәйкес, ұшақта коронавирусты жұқтырған жолаушы болған», - делінген хабарламада.

Баспасөз қызметі Алматы билігі «әуе кемесіне жанармай құюда санитарлық-карантиндік бақылауды күшейте отырып, қажетті шаралар қабылдағанын» атап өтті.         

«Короновирустың елдегі ең ірі мегаполиске енуі мен таралуын болдырмау үшін, жанармай құю операциясы жолаушылар мен экипажды эвакуацияламай жүргізілді», - деп түсіндірді департаменттегілер.

Алматыға Қытайдың бес қаласынан рейстер келетіндігін ескере отырып, мегаполис әуежайында санитарлық-эпидемияға қарсы және профилактикалық шаралар кешені жүзеге асырылуда. «Бүгін барлық рейстер ерекше бақылауда», - деп атап өтті баспасөз қызметі.

Шығыс Қазақстан облысындағы Қытаймен шекара уақытша жабылды

Мұндай сақтық шаралары Қытайда коронавирустың өршуіне байланысты қабылданған. 

25 Қаңтар 2020 13:10 1141

Шығыс Қазақстан облысындағы Қытаймен шекара уақытша жабылды

Қытайда коронавирустың өршуіне байланысты ШҚО-да ҚХР-дың Шыңжаң-Ұйғыр автономиялық ауданымен шекарасы уақытша жабылды, деп хабарлайды «Хабар 24» телеарнасы

Кеден бекеттерінде бақылау күшейтілді. Бұрын аймаққа кірген шетелдіктер жылу тепловизордан өтті. Облыстың шекаралас Зайсан және Үржар аудандарында медицина қызметкерлерін қосымша оқыту жүргізілді. Эпидемиологтар вирусқа қарсы зерттеулерге дайындалуда. Тек өткен айдың өзінде үш мыңнан астам Қазақстан мен Қытай азаматтары шекараны екі бағытта кесіп өткен.

 «Жолаушылар мен тасымалдаушылар арасында күдікті жағдайларды тіркеу кезінде әрекеттер алгоритмі және ақпарат схемасы бар. Шекара бекеттерінде келген адамдардың температурасын өлшейтін жылу түсіргіштері бар », — дейді Әлия Оспанова, Қазақстан Республикасы Денсаулық сақтау министрлігі ШҚО бойынша тауарлар мен қызметтердің сапасы мен қауіпсіздігі департаменті басшысының міндетін атқарушы.

Бұған дейін Қазақстанның Денсаулық сақтау министрлігі коронавирустың пайда болу себептері туралы айтып, Қытайға сапар шегудің қауіптілігі туралы ескерткен болатын. Қытайдан келгендер Қазақстанның әуежайларындағы, теміржол бекеттеріндегі міндетті байланыссыз термометриядан өтеді. Мамандар бүкіл ел бойынша жаттығулар өткізеді.

Жаңалықтарға жазылу: