Батыс Киевтен көтерілісті пайдаланып, Ресей Федерациясына соққы бермеуін сұрады, деп жазады inbusiness.kz CNN-ға сілтеме жасап.
"Вагнер" ЖӘК көтерілісі басталғаннан кейін АҚШ-тың жоғары лауазымды шенеуніктері одақтастар мен серіктестермен шұғыл түрде байланысып, оларға "негізгі хабарламаны" жеткізе бастады: Ресей Федерациясының президенті Владимир Путинге көтеріліс үшін кінәні Вашингтонға немесе НАТО-ға жүктеуге мүмкіндік бермеу үшін Батыс үнсіз қалуы керек.
Барлық америкалық шенеуніктер Ресей үкіметін АҚШ-тың көтеріліске ешқандай қатысы жоқ деп сендірді және Ресей Федерациясының ядролық арсеналының қауіпсіздігін сақтауға шақырды, дейді авторлар АҚШ шенеуніктеріне сілтеме жасай отырып.
Сонымен қатар, журналистердің айтуынша, америкалық барлау қолында "Вагнер" ЖӘК басшысы Евгений Пригожиннің жоспарлары туралы өте дәл мәліметтер болған. Телеарна дереккөзінің хабарлауынша, бастапқыда АҚШ барлау агенттіктері "тек кейбір одақтастармен", соның ішінде Ұлыбританиядан келген жоғары лауазымды шенеуніктермен тиісті ақпаратпен бөлісті, бірақ оны НАТО деңгейінде "кең ауқымда" жария ете алмаған.
АҚШ-та Ресейдегі "Вагнер" ЖӘК-тің көтерілісі туралы деректерді Конгресстегі "Сегіздік" деп аталатын топтың өкілдеріне ғана берілді.
CNN дереккөзінің хабарлауынша, украиналық шенеуніктерге алдын-ала көтеріліс туралы хабарланған жоқ, өйткені "АҚШ пен Украина шенеуніктері арасындағы әңгімелерді біреу-міреу естіп қоюы" мүмкін еді.
Көтеріліс басылғаннан кейін АҚШ президенті Джо Байден одақтастармен, соның ішінде Франция, Германия, Ұлыбритания және Канада басшыларымен, сондай-ақ Украина президенті Владимир Зеленскиймен келіссөздер жүргізді, деп хабарлайды телеарна. Басқосу аясында Байден көшбасшылармен Ресейге қатысты АҚШ барлау қызметінің деректерімен бөліскен.
Вашингтонда бүліктің басталуының болжамды күні туралы нақты деректер болмағаны атап өтілді. Алайда, барлау қызметтері Пригожин өзінің жоспарларын 10 маусымнан кейін, Ресей Қорғаныс министрлігі жалдамалыларды онымен ресми келісімшартқа отыруға мәжбүр еткеннен кейін ойластыра бастағанын анықтаған.
"Пригожин көтерілісі жайдан-жай болған оқиға емес. Америкалық шенеуніктер бірнеше ай бойы оның Ресейдің Қорғаныс министрлігімен араздығын бақылап, бір-біріне қоқан-лоқы көрсеткен жағдайларға баса назар аударды, деп атап өтті CNN. "Сондай-ақ, "Вагнер" көтеріліс қарсаңында қару-жарақ пен оқ-дәрілерді жинап жатқанының белгілері болды".
АҚШ Конгресінің барлау комитетінің төрағасы және "сегіздік" мүшесі, Демократиялық сенатор Марк Уорнердің айтуынша, Пригожиннің көтеріліске дайындығы бәрінің көз алдында болған дүние. Сонымен бірге, сенатордың айтуынша, америкалық барлау Ресейдегі жалдамалылардың шеруіне аса бір қарсылық көрсетілмегеніне таң қалды. "Он жыл бұрын Путин мұндай бассыздыққа жол бермес еді", - деп атап өтті Уорнер, оның пікірінше, Путиннің билігі қазір "анық әлсіреген".
Сонымен қатар, АҚШ шенеуніктері Пригожин соңына дейін барып, Мәскеуді немесе Кремльді басып алуға тырысса, ойсырата жеңіліске ұшырар еді деген пікірде. Сондықтан "Вагнер" ЖӘК басшысы Беларусьпен келісімге келді, деп санайды Вашингтонда.
