Nur Otan партиясы төрағасының орынбасары Бауыржан Байбек өз еркімен қызметінен кетті, деп хабарлайды inbusiness.kz.
Бұл туралы ол Facebook-те жазды.
"...Съезде ел Президенті, Nur Otan партиясының жаңадан сайланған Төрағасы Қасым-Жомарт Кемелұлы Тоқаев партияны реформалау, жұмыстың әдістері мен мазмұнын жаңарту, партиялық бақылауды күшейту, қоғамдық қабылдаулардың тиімділігін арттыру, кадрлық әлеуетті нығайту, сондай-ақ жаңа формациядағы адамдарды тарту жөнінде нақты міндеттер қойды.
Nur Otan алдына жаңа көзқарастар мен тәсілдерді талап ететін мүлде жаңа міндеттер қойылды. Сондықтан мен партия Төрағасы Қасым-Жомарт Кемелұлы Тоқаевқа атқарып отырған қызметімнен босату туралы тиісті өтініш бердім. Бүгін менің өтінішім қанағаттандырылды", – деп жазды Бауыржан Байбек.
Ол 20 жылдан аса уақыт мемлекеттік және партиялық қызметте еңбек еткен.
"Жалпы алғанда 6 жылға жуық – Nur Otan төрағасының бірінші орынбасары, 3 жылға жуық – Президент Әкімшілігі Басшысының орынбасары лауазымдарында, 4 жыл Алматы қаласының әкімі болып жұмыс істедім", – деді Nur Otan партиясы төрағасының орынбасары.
