Мемлекет басшысының көліктік-логистикалық әлеуетті дамыту жөніндегі тапсырмасы аясында Бейнеу – Маңғыстау теміржол учаскесін жаңғырту жобасы жүзеге асырылып жатыр, деп хабарлайды inbusiness.kz сайты.
Қазіргі уақытта разъездердің басым бөлігінде негізгі жер жұмыстары аяқталып, рельс-шпал торын төсеу мен жолдарды балластау жалғасуда. Сондай-ақ бағыттауыш бұрмаларды орнату және су өткізу құбырларын ұзарту жұмыстары жүргізілген. №12 разъезде көпір құрылысы қолға алынған.
Жоба аясында дабыл беру, орталықтандыру және бұғаттау жүйелері де жаңартылуда. Магистральдық кабельдер мен талшықты-оптикалық байланыс желілерін төсеу аяқталып, қазір оларды сынақтан өткізу және іске қосуға дайындау жұмыстары жүріп жатыр.
Теміржолшылардың мәліметінше, барлық жұмыс бекітілген кестеге сәйкес орындалуда.
Жобаны іске асыру нәтижесінде Бейнеу – Маңғыстау учаскесінің өткізу қабілеті тәулігіне 12-ден 17 жұп пойызға дейін ұлғайып, тасымал қауіпсіздігі мен теміржол инфрақұрылымының тиімділігі артады. Жобаны 2026 жылдың соңына дейін аяқтау жоспарланған.
