Тура 100 күннен кейін, 2022 жылдың 4 ақпанында Бейжіңде XXIV қысқы Олимпиада ойындары басталады. ҰОК сайтында Бейжіңде өтетін ақ Олимпиадаға байланысты қызық мағлұматтар жарияланды, деп жазады inbusiness.kz.
Тарихқа көз жүгіртсек, бұл Олимпиада біздің елімізде өтуі де мүмкін еді. 2013 жылдың тамыз айының ортасында оңтүстік астанамыз Алматы қаласы бірінші болып ХОК-қа ресми өтінім берді. Сонымен Олимпиаданы өткізу құқығы үшін шешуші сәтте Бейжің мен Алматы қалаларына таңдау түсті. Нәтижесінде Қытай астанасы бар болғаны 4 дауыс (44:40) басымдықпен жеңіске жетіп, кезекті қысқы Олимпиада ойындарын өткізу құқығына ие болды.
Бейжің қысқы Олимпиада ойындарын өткізу құқығын 2015 жылдың 31 шілдесінде алды. Айта кетерлігі, Қытай астанасы қысқы және жазғы Олимпиада ойындарын қабылдаған ең алғашқы қала болып саналмақ.
Олимпиада ойындары "Таза мұз бен қардағы қуанышты күн" ұранымен өтеді және 2008 жылғы Олимпиаданың мұрасына негізделеді.
Сондай-ақ 2022 жылдың ақпан айындағы Олимпиада ойындары Қытайдың Жаңа жылымен немесе елдің басты ұлттық мерекесі Көктем мерекесімен тұспа-тұс келетінін атап өткен жөн.
Бірақ бұл ойындардың ерекшелігі – Бейжің қабылдаушы астана ретінде таңдалғанымен, жарыстар үш қалада өтеді. Атап айтқанда, Бейжіңнен басқа спортшыларды Янцин мен Чжанцзякоу қалалары қабылдайды.
Бейжің Олимпиадасында спорттың жеті түрінен 109 медаль жиынтығы сарапқа салынады. Олар: биатлон, бобслей (бобслей, скелетон), керлинг, конькимен сырғанау (конькимен жүгіру, мәнерлеп сырғанау, шорт-трек), шаңғы спорты (тау шаңғысы, скандинавиялық аралас, шаңғымен трамплиннен секіру, фристайл, сноуборд) , шаңғымен сырғанау және хоккей.
Бейжің 2008 жылғы Олимпиаданың спорт нысандарын іске қосады және барлық мұз жарыстарын (керлинг, хоккей, конькимен жүгіру спорты), сондай-ақ қарда төрт жарысты (ерлер мен әйелдер арасындағы сноубординг пен шаңғы фристайлындағы биг-эйр) қабылдайды.
Яньцинь – астананың қала маңындағы ауданы, Пекиннен солтүстік-батысқа қарай 80 км жерде, Ұлы қытай қабырғасының әйгілі бөліктері – Бадалин мен Джунгугуан орналасқан жерде. Онда шаңғы, бобслей, скелетон және шана спортында медальдар ойнатылады.
Чжанцзякоу солтүстік-батысқа қарай көршілес Хэбэй провинциясында орналасқан. Онда орналасқан танымал қысқы курорт Чунли сноубординг, шаңғы спортының барлық түрі және биатлоннан қалған жарыстарды қабылдайды.
Олимпиада ойындары 13 спорт нысанында өтеді.
Суретші Линь Цуньчжэнь жасаған 2022 жылғы Олимпиаданың эмблемасы Қытайдың дәстүрлі және заманауи мәдениетінің элементтерін біріктіреді, сонымен қатар қысқы спорт түрлеріне деген сүйіспеншілігін көрсетеді.
Логотип қытайлық "қыс" (冬) иероглифына негізделген. Жоғарғы бөлігінде эмблема конькимен жүгірушінің бейнесіне, төменгі бөлігінде шаңғышының силуэтіне ұқсайды. Ұшатын таспаның мотиві Қытайдың тау жоталарын, спорттық нысандарды, шаңғы тебуді және мұз айдындарын білдіреді. Эмблема Олимпиада ойындары Қытайдың жаңа жылымен сәйкес келетінін көрсетеді.
Көк түс арманды, болашақты, сондай-ақ мұз бен қардың тазалығын білдіреді. Қызыл және сары – Қытай туының түстері, олар ұмтылысты, жастықты және өмірлік энергияны білдіреді.
Together for a Shared Future (ортақ болашақ үшін бірге) – 2022 жылғы Бейжіңдегі қысқы Олимпиада және Паралимпиада ойындарының ресми ұраны.
Ұран жаһандық проблемаларды жеңуде бүкіл адамзат үшін ортақ болашағы бар ойындар мен қоғамдастықтың күшін бейнелейді. Бұл сөздер бүкіл әлемде жарқын болашақ үшін, әсіресе коронавирустық пандемиядан туындаған қиындықтарды ескере отырып, бірлесіп жұмыс істеу қажеттілігін көрсетеді.
Together for a Shared Future олимпиадалық қозғалыстың негізгі құндылықтары мен пайымын, сондай-ақ әлемдік бірлікке, бейбітшілік пен прогреске деген ұмтылысты көрсете отырып, бірлік пен ортақ күш-жігерді көрсетеді. Ұраны паралимпиадалық ойындардың негізгі құндылықтарына, атап айтқанда, олардың неғұрлым инклюзивті қоғам құрудағы рөліне сәйкес келеді.
Ұранды таңдау процесі 2020 жылдың мамыр-қыркүйек айларына созылды. Осы уақыт ішінде Бейжің-2022 ұйымдастыру комитеті Қытай университеттерінің 79 ұсынысын жинады. Әр түрлі саладағы сарапшылар қысқа тізімге енген 11 нұсқаны таңдады.
