Бейжің Олимпиадасына қатысатын барлық қазақстандық спортшы коронавирусқа қарсы вакцина алған. Бұл туралы Мәдениет және спорт вице-министрі Серік Жарасбаев айтты, деп хабарлайды inbusiness.kz тілшісі.
Ол дүбірлі додада 8 спорт түрінен 34 спортшы бағын сынайтынынын атап өтті.
"Олимпиадаға қатысатын спортшылардың басым бөлігі Алматы қаласынан – 8-9 спортшы, қалғандары басқа өңірлерден – 3-4 спортшы. Фристайл могулда 6 қазақстандық спортшы бағын сынайды. Олар Шығыс Қазақстан облысынан. Олар біздің – басты үмітіміз", - деді вице-министр ОКҚ-де өткен баспасөз мәслихатында.
Серік Жарасбаев бүгінде спортшылар бірнеше топқа бөлініп, дайындалып жатқанын айтты.
"Олардың бір бөлігі бүгінде Еуропада дайындалып жатыр. Сол жақтан оларды бірден Бейжіңге ұшу мәселесін қарастырып жатырмыз. Қалған 2 топ бар. Біріншісі, "Алау" мұз айдынында бабл жүйесі бойынша дайындалуда. Бұл – шорт трек, коньки тебу. Екіншісі, фристайл, қысқы көп сайыстан бағын сынайтын спортшылар Алматыдағы "Саду" спорт базасында бабл жүйесі бойынша дайыналып жатыр. Олар 14-27 қаңтар аралығында ешкіммен қарым-қанынас жасамай дайындалуда. Барлық спортшы коронавирусқа қарсы екпе алған", - деді министрдің орынбасары.
Оның айтуынша, Қазақстан ұлттық құрамасы биыл 27 қаңтарда чартерлік рейспен Нұр-Сұлтаннан Алматыға кейін Бейжіңге ұшады.
"Олар Бейжіңде 4 күн карантинде болады. Кейін жарыстарға қатысады", - деді Серік Жарасбаев.
Айта кетейік, Қысқы Олимпиада ойындары 4 ақпанда басталады. Дүбірлі додаға 95 елден 4 мыңнан аса спортшы қатысады деп жоспарланып отыр. Онда 15 спорт түрінен 109 медаль сарапқа салынады.
Дәурен Ерболат
