Беларусьта 18 қазанда ұйымдастырылған наразылық шаралары кезінде 240-тан астам адам қамауға алынды. Бұл туралы ресми түрде тіркеуге алынбаған "Весна" деп аталатын құқық қорғау орталығы мәлім етті.
Жексенбіде оппозиция елдің бірқатар қаласында көшеге шығып ереуілдеткен еді. Құқық қорғаушылар тәртіп сақшылардың қолына түскендердің санын әлі де анықтап жатыр. Қамалғандардың басым бөлігі – Минск, Светлгорск, Брест, Витебск, Жодино, Фаниполи, Сморгони, Новополоцк, Дзержинск қалаларының тұрғындары.
Ескере кететін жайт, Беларусьтағы ереуілдердің басталғанына осымен 72 күн болды. 9 тамызда өткен президент сайлауынан кейін халық бас көтеріп, қазіргі президент Александр Лукашенконың биліктен кетуін талап еткен еді. Полицейлер мен ереуілшілер арасындағы қақтығыс кезінде алғашқы күндері 6,7 мың адам қамалған болатын. Елдің ІІМ сол кездегі тәртіпсіздіктер салдарынан жүздеген ереуілшінің, құқық қорғау органдарының 130 қызметкерінің жарақат алып, 3 адамның қаза болғанын мәлім етті.
Табиғат Нұрболат
