"Нұрлы жол" бағдарламасы бойынша білім саласына бөлінген қаржының 2,5 млрд-ы игерілмей отыр. Білім және ғылым вице-министрі Бибігүл Асылова Үкіметте өткен жиында осылай деп мәлімдеді. Оның айтуынша ағымдағы жылы саладағы жобаларды жүзеге асыруға Ұлттық қордан 71,7 млрд теңге аударылған. Оның 26,5 млрд-ы өткен жылы салына басталған 53 мектептің құрылысын аяқтауға жұмсалса, 45,2 млрд теңгесі 56 жаңа оқу орындарын салуға бағытталған. Алайда, еліміздің 7 өңірі, Жамбыл, Шығыс-Қазақстан, Алматы, Қызылорда, Маңғыстау, Оңтүстік Қазақстан облыстарында мемлекеттік бағдарламамен бой көтереді деп жоспарланған мектептер мен балабақшалар салынбаған.
Бибігүл Асылова, ҚР білім және ғылым вице-министрі:
"Оның себебі мемлекеттік сатылымдардың үнемделуі. Сондай-ақ мердігерлердің орындалған жұмыстардың актісін ұсынбауы мен конкурстық процедураларға шағымдардың молдығы әсер етіп отыр. Осы жылдың соңына дейін 70 мектептің құрылысы аяқталады деп жоспарлануда".
