Оқу-ағарту министрі Ғани Бейсембаев Мәжіліс кулуарында 1 қыркүйекте жұмысқа шыққан мұғалімдерге төлемақы берілетінін айтты, деп хабарлайды inbusiness.kz сайты.
Ведомство басшысының сөзінше, Білім күні бастауыш сыныптың мұғалімдері ғана жұмысқа шыққан.
"Ата-аналардан келіп түскен өтінішке сәйкес Білім күніндегі салтанатты жиынды өткізуді қолдадық. Сол себептен де 1 қыркүйек – Білім күні жойылмады, аталып өтті. Әр мектеп әкімшілігіне сенбі-жексенбі күндері қажеттілігіне байланысты жұмысқа шыққан мұғалімдердің төлемақысы толығымен берілуі тиіс екені ескертілді. Мұны білім басқармалары біледі. Бізге барлық мектепте төленді деген ақпарат келді", – деді Ғани Бейсембаев.
Министр бұл талапты орындамаған мектептер бойынша қадағалау жүргізіп, тиісті шара қолдануға дайын екенін жеткізді.
