Премьер-Министр Әлихан Смайылов бірқатар облыс әкімдерінің орынбасарларына сөгіс жариялауды тапсырды, деп хабарлайды inbusiness.kz сайты.
"Стихиялық қоқыс үйінділері мен қалдықтарды реттеу инфрақұрылымын дамыту – аса өткір тұрған мәселелердің бірі. Біз бұл мәселені биыл қыркүйек айында Үкімет отырысында қарадық. Бірқатар тапсырмалар берілді, оның ішінде стихиялық қоқыстардың санын 2 есеге қысқарту мәселесін көтердік. Алайда Ұлытау, Алматы және Маңғыстау облыстары ең төмен нәтиже көрсетіп отыр. Аталған өңір әкімдеріне осы салаға жетекшілік жасайтын орынбасарларына қатаң сөгіс жариялауды тапсырамын", - деді ол.
Үкімет басшысының сөзінше, аудандар мен қалалардың 75%-ы коммуналдық қалдықтарды реттеу бағдарламаларын әзірлеуге әлі кіріскен де жоқ.
"Ал мерзім әлдеқашан өтіп кетті. Мысалы, Батыс Қазақстан, Солтүстік Қазақстан, Түркістан облыстарында және тағы да сол Маңғыстау облысында бірде-бір жоспар әзірленбеген. Сондықтан аталған өңір әкімдері де өздерінің осы салаға жетекшілік ететін орынбасарларына тапсырманы орындамағаны үшін сөгіс жарияласын. Енді бұл процесті әкімдердің өздері жеке бақылауда ұстауы тиіс", - деді Әлихан Смайылов.
Министрлік сатып алу рәсімдеріне байланысты мерзімді келесі жылдың ортасына дейін ұзартуды сұрап отыр.
Премьер-Министр тиісті жұмыстар келесі жылдың 1 сәуіріне дейін аяқталмаса, тәртіптік шаралар қабылданатынын баса айтты.
