Ішкі істер министрі Ержан Сәденов Сенаттың жалпы отырысынан кейінгі брифингте Қуандық Бишімбаевтың ісі бойынша тергеу қалай жүргізіліп жатқанын айтты, деп хабарлайды inbusiness.kz сайты.
“Тергеу амалдары жүргізіліп жатыр. Шынында да, гастроорталықтың директоры, екінші адам оның (ред. - Қуандық Бишімбаевтың) туысы. Бүгінгі таңда, қылмыстық іс тергеліп жатыр. Ешқандай мәселе жоқ. Жақын арада тергеу жұмыстары аяқталады деп ойлаймын”, - деді Ержан Сәденов тілшілердің сауалына берген жауабында.
Тілшілер ведомство басшысынан қылмыс болған күні бейнекамералардағы жазбаны өшіргендер анықталды ма деп сұрады.
“Мұндай әрекетке барған барлық адам анықталды. Қылмыстық процесс аясында олардың мәртебесі белгіленді. Барлық бейнежазба қалпына келтірілді”, - деп нақтылады спикер.
