Ал Ethereum (ETH) 2021 жылдың желтоқсанынан бері алғаш рет 4000 долларлық маңызды межеден асып, 4181 долларға дейін өсті, деп хабарлайды inbusiness.kz сайты Азертадж агенттігіне сілтеме жасап.
CNBC дерегіне сенсек, бағаның өсуі криптовалюта нарығына ғана емес, сонымен қатар АҚШ-тағы соған байланысты акцияларға әсер етті. Бұл қозғалыс инфляция жөніндегі маңызды деректердің жариялануы күтіліп отырған кезде, америкалық индекстерге арналған фьючерстердің өсуімен қатар келді. Сарапшылар бұл өсімді Азиядағы инвесторлардың белсенділігімен және АҚШ-тың мемлекеттік қарызының айтарлықтай артуымен байланыстырады.
Биткоин 1,2%-ға өсіп, 119 910 долларға жетті. Әлемдегі ең ірі криптовалюта алдымен 122 370 долларға дейін көтеріліп, шілде ортасында тіркелген 123 000 доллардан асатын тарихи максимумға жақындады, кейіннен 120 000 доллардан төмендеді.
Биткоин мен басқа криптовалюталардың өсуіне АҚШ-тағы оңтайлы реттеу шаралары әсер етуде. Мысалы, өткен аптада Дональд Трамп жинақ және зейнетақы қорларына (401(k) секілді) балама активтер мен жеке капиталға, оның ішінде криптовалютаға инвестиция жасауға мүмкіндік беретін жарлыққа қол қойды.
Трамптың жарлығынан кейін АҚШ-тағы жетекші биткоин биржалық қорларына 3 күн қатарынан ірі көлемде капитал тартылды. Бұл биткоин бағасының айтарлықтай өсуімен сәйкес келді. Алайда криптовалютаның соңғы өсімі демалыс күндері төмен өтімділік жағдайында орын алғандықтан, қазіргі баға деңгейінің тұрақты сақталуына қатысты кейбір сұрақтар туындайды.
Трамптың өткен аптадағы жарлығы соңғы айларда оның әкімшілігі тарапынан қабылданған криптовалюталарға қолайлы бірқатар реттеуші шаралардан кейін жасалды.
Айта кетсек, жыл басынан бері биткоинның бағасы 30 пайызға жоғарылаған.
Ал "CoinMarketCap" сауда алаңының дерегінше, криптовалюта секторының нарықтағы құны қазір 4 триллион долларға жақындап қалды.
