Биыл маусымда 5,8 мың шақырым болатын 18 жол учаскесі ақылы болады, деп хабарлайды inbusiness.kz.
"2021 жылы маусымда 5,8 мың шақырымдық 18 учаскесі ақылы болады. Олар: Шымкент – Өзбекстан шекарасы, Орал – Ресей шекарасы (Саратов), Орал – Ресей шекарасы (Самара), Ресей шекарасы (Орынбор) – Ақтөбе, Щучинск – Петропавл, Шымкент – Қызылорда, Шымкент – Тараз, Тараз – Қайнар, Қапшағай – Талдықорған, Қарабұтақ – Қызылорда, Ақтөбе – Орал, Атырау – Бейнеу – Өзбекстан шекарасы, Ақтау – Бейнеу, Қостанай – Ресей шекарасы (Троицк), Нұр-Сұлтан – Қостанай, Павлодар – Ресей шекарасы (Омбы), Нұр-Сұлтан –Павлодар, Павлодар – Семей – Қалбатау учаскелері", - деп жазылған "QazAvtoJol" ұлттық компаниясы таратқан хабарламада.
Әр учаске бойынша қандай көліктерден төлемақы алынатыны тас жолдың техникалық санатына тікелей байланысты.
"Мәселен, І-техникалық санаттағы тас жолдарда барлық автокөлік, ал ІІ және ІІІ-техникалық санаттағы тас жолдарда тек жүк көліктері төлем жасайды. Ал жаңа ақылы учаскелер бойынша төлем мөлшерлемесін ҚР Индустрия және инфрақұрылымдық даму министрлігі қарастырып жатыр", - дейді компаниядан.
Ал ақылы жолдарды сынақтан өткізу кезінде көліктерден төлем уақытша алынбайды.
