Биыл 70 мыңнан астам қазақстандық кәсіби оқуға жіберіледі. Олар қысқа мерзімді курстан келген бойда жұмысқа орналасады. Оқытылатын жұмысшы мамандықтар қатарында – тігінші, электр механигі, техник-механик, аккумулятор маманы, электр монтаждаушы, аспаз және токарь бар. Бұл туралы Орталық коммуникациялар қызметінде ҚР еңбек және халықты әлеуметтік қорғау вице-министрі Біржан Нұрымбетов мәлімдеді, деп хабарлайды atpress.kz.
Оның айтуынша, сондай-ақ, биыл шағын және орта бизнес өкілдеріне 5800 шағын несие беру жоспарланған. Бүгінде қаржыға қол жеткізген 174 адам жеке ісін ашып, кәсіпкер атаныпты.
Сонымен қатар, жұмыспен қамту бағытында да көптеген жобалар жүзеге асуда. Мәселен, биыл елімізде әлеуметтік жұмыс орындарына 18 мыңға жуық, жастар тәжірибесіне 12 мыңнан астам адам жіберілген. Ал, қоғамдық жұмыстарға 51 мың қазақстандық тартылыпты.
