ҚР Көлік министрі Марат Қарабаев 2023 жылы Қазақстандағы ақылы жолдар қанша табыс тапқанын айтты, деп хабарлайды inbusiness.kz сайты.
Үкімет отырысында министр атап өткендей, биылғы жылдың 11 айында төрт ақылы жолдан түскен кіріс 26,5 млрд теңгені құрады. Қаржы республикалық маңызы бар Астана – Теміртау, Астана – Щучинск, Алматы – Қапшағай және Алматы – Қорғас автомобиль жолдарының учаскелерінен түскен.
Жиналған қаражат жол және жол бойындағы инфрақұрылымды, сондай-ақ ақылы учаскелердегі бағдарламалық-аппараттық кешендерді күтіп ұстауға және қолдауға жұмсалды, деп хабарлады ведомство.
Министр ұсынған ақпаратқа сәйкес, 2024 жылы елімізде тағы төрт ақылы учаске ашылады және қазақстандықтар ақылы жолдармен жүру үшін 35 млрд теңге төлейді деп жоспарлануда.
