2022 жылғы қаңтар-тамыз аралығында "Алаяқтық" бабы бойынша 29,9 мың құқық бұзушылық тіркелген. Бұл былтырғы жылмен салыстырғанда 3%-ға артық, деп жазады inbusiness.kz finprom.kz-ке сілтеме жасап.
Оның басым бөлігі интернет-алаяқтық деректері (13,8 мың) екенін атап өткен жөн. Бұдан елімізде бөлек қылмыстық құқық бұзушылықтың 180-і төлем карталарын пайдалану арқылы, 87-сі ақшаны қарызға беру арқылы, 36-сы несие беру саласында, біреуі жылжымайтын мүлікпен байланысты салаларда тіркелді.
Қылмыстық құқық бұзушылықтардың негізгі бөлігі Алматыда (7 мың жағдай) орын алған. Одан кейінгі орындарда Нұр-Сұлтан (4,4 мың) және Шымкент (2,7 мың) қалалары бар.
Басқа өңірлерге қарағанда құқық бұзушылықтар Ұлытау, Жетісу және Абай облыстарында аз тіркелген. Аталған облыстар маусым айында құрылған.
Жыл басынан бері алаяқтық бойынша 3,9 мың адам ұсталды. 2021 жылмен салыстырғанда 3,8%-ға аз. Ақпаратқа сәйкес, олардың басым бөлігі (3,2 мың адам) жұмыссыздар.
Бұдан бөлек халықты сан соқтырғандардың ішінде 114 жұмысшы, 98 мемлекеттік қызметші, 60 жеке кәсіпкер, 42 оқушы, 10 әскери қызметші де бар.
