Бұл туралы Денсаулық сақтау министрлігі Ана мен бала денсаулығын қорғау департаментінің директоры Мағрипа Ембергенова онлайн брифинг барысында мәлім етті, деп хабарлайды inbusiness.kz.
"10 қарашадағы жағдай бойынша, "Аңсаған сәби" бағдарламасы бойынша 6 мың емделушіге экстракорпоральды ұрықтандыру жасалды. Бұл – бүкіл жоспарлы көлемнің 84%-ы. Тағы 740 емделуші осы бағдарламаға қатысады. 2 000-нан астам жүкті әйел есепке алынды. Бүгінгі таңда аталған бағдарлама бойынша 40 нәресте дүниеге келді", – деді спикер.
Ана мен бала денсаулығын қорғау департаменті директорының айтуынша алдағы бес жылда "Аңсаған сәби" бағдарламасы бойынша 7 000 квота бөлінеді.
"Дені сау ұлт" ұлттық жобасы аясында 2025 жылға дейін жыл сайын бедеулігі расталған 7 000 жұпқа міндетті медициналық сақтандыру аясныда ЭКҰ жасату қарастырылған", – деді Мағрипа Ембергенова.
