Мемлекеттік кірістер комитеті елімізге тұрмыстық пиротехникалық заттардың импорты туралы қызықты статистиканы бөлісті, деп хабарлайды Inbusiness.kz сайты.
"Биылғы қаңтар-қараша аралығында елімізге құны 663,9 мың АҚШ долларын құрайтын жалпы салмағы 231,1 тонна отшашу импортталған. Оның арасында петарда, фонтан, отшашу батареялары, бенгал оттары, түрлі-түсті түтіндер, жерүсті отшашулары және басқа да тұрмыстық пиротехникалық заттар бар" деп жазылған комитеттің ресми хабарламасында.
Отшашудың негізгі импорттаушысы - Қытай болса, Германиядан, Ұлыбританиядан және АҚШ-тан 17,6 мың АҚШ долларына 0,1 тонна отшашу жеткізілген.
2022 жылмен салыстырғанда биыл елге құны 215 мың АҚШ долларына және 71,8 тоннаға көп пиротехника әкелінген.
Өткен жылдың қаңтар-қараша айларында Қазақстанға құны 448,9 мың АҚШ доллары болатын 159,4 тонна тауар жеткізілді.
